דער עף-עי-עי (FAA) אדמיניסטראטאר, ברייען בעדפארד, זאגט אז אינוועסטיגעיטארס האבן שוין אידענטיפיצירט דעם פראבלעם וואס האט געפירט צו דעם מאסיוון קאמיוניקאציע אויספאל דעם פארגאנגענעם נאוועמבער 13, 2026. ער האט אונטערגעשטראכן אז עס איז דא "נול באווייזן" אז עס האט פאסירט עפעס בייזוויליג אדער אז עס האט צוטון מיט עי-איי (AI).

באאמטע געבן איבער אז דער פראבלעם האט זיך אנגעהויבן ווען די קאנטראקטאר פירמע 'על-3-העריס' (L3Harris) האט געטוישט אלטע קופערנע טעלעקאם ווייערס צו נייע 'פייבער אפטיקס' ביי אן אפגערוקטע עף-עי-עי לאקאציע. טראנספארטאציע סעקרעטאר שאן דאפי האט דערציילט אז איין ראוטער האט דעמאלט אנגעהויבן פלייצן אנדערע ראוטערס מיט מער ווי 1,000 קאנעקשאן פרואוון יעדע פיר ביז פינף סעקונדעס.

די איבערגעפילטע סיסטעם האט איבערגעריסן דעם קאנטאקט צווישן די עיר-טרעפיק קאנטראלערס און די פליגערס, און האט געמאכט אז די ראדאר און קאמיוניקאציע דאטא זאל ווערן אומסטאביל אין 17 פון די 22 עף-עי-עי קאנטראל צענטערן איבער'ן לאנד.

וויבאלד די עף-עי-עי האט נישט געקענט באלד אנווייזן וואס די אורזאך איז, האבן זיי באפוילן א נאציאנאלע 'גראונד סטאפ' אלס א פארהיטונגס מיטל. דער אפשטעל האט אנגעהאלטן פאר מער ווי פיר שעה, וואס איז די לענגסטע צייט זינט די סעפטעמבער 11 אטאקעס. בעדפארד האט קלארגעשטעלט אז קיין איין צענטער איז נישט געגאנגען אינגאנצן 'אפ-ליין', אבער די אגענטור האט נישט געוואלט נעמען קיין טשענס אז א צענטער זאל פארלירן אלע קאמיוניקאציעס.

דער קריזיס האט געפירט דערצו אז ארום 9,200 פלייטס זענען געווארן געקענסעלט און נאך 7,500 זענען פארשפעטיגט געווארן יענעם טאג, מיט איבער 10,000 פלייטס וואס זענען געווארן אפעקטירט אינגאנצן. די עירליינס האבן נאך אריינגעארבעט טיף אינעם וויקענד צוריקצוקומען צום געהעריגן סקעדזשועל און צו פלאצירן די פליגערס און מאנשאפטן אויף זייערע ריכטיגע ערטער.

דערווייל האבן באאמטע נאך נישט געזאגט צי דער שולד פאלט אויף א מענטשליכע טעות פונעם קאנטראקטאר אדער אויף א מאשין דורכפאל. די פירמע 'על-3-העריס' זאגט אז זיי שטיצן און ארבעטן אינאיינעם מיט די עף-עי-עי אינוועסטיגעישאן. דערווייל בלייבן אבער פילע רייזנדע מיט די שווערע קשיא: ווי אזוי קען זיין אז איין איינציגע ראוטער זאל קענען אפשטעלן די לופטן פונעם גאנצן לאנד?