א דראמאטישע ווידיאו וואס פארשפרייט זיך יעצט אויפן אינטערנעט צייגט דעם שרעקליכן קראפט פון נאטור, ווען א מאסיווע פעלדז-שטיין ווערט מיטגעשלעפט דורך א ים פון בלאטע און חורבות ביי די קאטאסטראפאלע פארפלייצונגען וואס האבן באטראפן דעם נעפאל-טיבעט גרעניץ ראיאן דעם פארגאנגענעם אוגוסט 26, 2026. די ווידיאו, וואס איז געכאפט געווארן פון א דאך בעת די בלאטיגע כוואליעס האבן זיך דורכגעריסן א טאל אין די הימאלייע בערג, צייגט ווי דער ריזיגער שטיין שווימט מיט ווי עס וואלט גארנישט געוואויגן, א זאך וואס גיט א לעבעדיגע בילד פון די אומגעהויערע כוחות וואס די פארפלייצונג האט מיטגעברענגט.

דער אומגליק האט זיך אנגעהויבן ווען א גרויסע שטיק פון א גלעטשער (אייז-בארג) האט זיך אפגעריסן הויך אין די בערג העכער די 'לענדע' טייך אין טיבעט, און איז געפאלן ארום 4,000 פיס בעפארן אריינקראכן אינעם טאל. דאס האט לכתחילה פארשטאפט דעם טייך, אבער קורצע צייט דערויף האט די בלאקאדע נאכגעגעבן, און ארויסגעלאזט א מערדערליכע שטראם פון וואסער, אייז און שטיינער וואס האט חרוב געמאכט אלעס אין איר וועג ביי די דערפער אונטן.

די בילדער פון חורבן זענען שוידערליך. די פארפלייצונגען האבן אוועקגעשווענקט הייזער, בריקן, עלעקטריק פלאנטס, און גרעניץ אינפראסטרוקטור אין נעפאל און אין טיבעט. די אויטאריטעטן באריכטן איבער הונדערטער טויטע, און די צאל שטייגט נאך אלס ווי די זוכונגען גייען אן, בשעת ווייט איבער א טויזנט מענטשן זענען נאך אלס פאררעכנט אלס פעלנדיג אויף ביידע זייטן פונעם גרעניץ.

סייענטיסטן האבן לכתחילה געמיינט אז אן ערדציטערניש פון א 4.4 מאגניטוד האט פאראורזאכט אז דער גלעטשער זאל זיך אפברעכן, אבער די אמעריקאנער געאלאגישע סורוועי (USGS) האט שפעטער קלארגעשטעלט אז די סעיסמישע סיגנאלן, וואס האבן רעקארדירט א 5.2 מאגניטוד, זענען באמת געקומען פונעם מאסיוון לאנד-רוק (לענדסלייד) זעלבסט, און נישט פון קיין ערדציטערניש. עקספערטן וואס שטודירן די געפארן פון גלעטשערס רופן עס אן אלס איינע פון די ערגסטע אינצידענטן פון דעם סארט וואס זיי האבן נאר אמאל בייגעוואוינט.

די ווידיאו פונעם שטיין גיט א קלארע, כאטש שרעקעדיגע, בילד פון די מאסיווע כוחות וואס וואסער פארמאגט צו קענען רוקן אזעלכע ריזיגע שטיינער אויף לאנגע שטרעקעס. געאלאגן זאגן אז דאס ערקלערט אן אלטע סוד וויאזוי ריזיגע שטיינער פון די 'אייז אלטער' זענען געטראפן געווארן מיילן ווייט פון זייער ארגינעלע פלאץ. צו זען ווי אזא ריזיגע פעלדז ווערט מיטגעשלעפט מיט בלאטע און וואסער אין רעאלע צייט, גיט א לעבעדיגע באגריף וויאזוי אזעלכע זאכן פאסירן, אפילו אויב די יעצטיגע פארפלייצונג האט פאסירט אין בלויז עטליכע מינוט אנטשטאט טויזנטער יארן.

אויסער די סייענטיפישע אינטערעסע, האט די קאטאסטראפע פריש אויפגעוועקט זארג איבער די אומסטאביליטעט פון די גלעטשערס אין די הימאלייע ראיאן, וואס צעלאזן זיך אין א פיל שנעלערן טעמפא אין די לעצטע יארצענדלינג. כאטש עס איז נאך צו פרי צו באשולדיגן דעם ספעציפישן אינצידענט דירעקט אויף קלימאט טויש, זאגן עקספערטן אז עס שטימט מיט א ברייטערע בילד פון מערערע גלעטשער געפארן ווי די ראיאן ווערט ווארעמער. מיט טויזנטער גלעטשער אזערעס איבער נעפאל, אינדיע און טיבעט - וואס צענדליגע פון זיי זענען שוין קלאסיפיצירט אלס מעגליך געפארפול - פאדערן עקספערטן מען זאל איינשטעלן בעסערע פרי-ווארענונג סיסטעמען צו באשיצן די איינוואוינער. דערווייל בלייבט די ווידיאו פונעם מיטגעשלעפטן שטיין א שוידערליכע דערמאנונג פון א טראגעדיע וואס האלט נאך אינמיטן ווערן געמאסטן אין פארלוירענע לעבנס און פאמיליעס וואס זוכן זייערע נאנטע.