א היסטארישע דעלעגאציע פון די גרעסטע רבנים און אדמו"רים אין אמעריקע איז אפגעפארן קיין וואשינגטאן זיך צו טרעפן מיט פרעזידענט טראמפ אינעם ווייסן הויז. די הויפט טעמעס אויפן טיש זענען געווען צו רעדן איבער אידישע ארעסטאנטן, און דאס פארשטארקן די באציאונגען מיטן חרדי'שן ציבור פאר די קומענדיגע וואלן. עסקנים האבן אויך געפלאנט איבערצוגעבן א ספעציעלן בריוו איבער די גזירות הגיוס אין ארץ ישראל, צו וועלכן פילע אדמו"רים און ראשי ישיבות האבן שוין געהאט מסכים געווען. אבער צוליב א מאנגל אין קאארדינאציע צווישן די רבנים אין די לעצטע מינוט, איז דער בריוו למעשה דורכגעפאלן און נישט איבערגעגעבן געווארן.

אינדערפרי האבן זיך די רבנים ארויסגעלאזט אין וועג מיט פריוואטע פליגערס. דער סאטמארער רבי פון וויליאמסבורג און דער באבובער רבי זענען געפארן אינאיינעם פונעם טעטערבארא לופטפעלד, באגלייט מיט זייערע קינדער און נאנטע מענטשן. עס איז געווען אינטערעסאנט צו באמערקן אז דער סאטמארער רבי פון וויליאמסבורג איז געקומען צום באגעגעניש מיט א געווענליכן הוט און נישט מיט קיין שטריימל. דער וויזשניצער רבי פון מאנסי איז אויך ארויסגעפארן פון דארט מיט א פריוואטן פליגער אינאיינעם מיט זיינע קינדער. צו דער זעלבער צייט איז דער סאטמארער רבי פון קרית יואל באזונדער אפגעפלויגן קיין וואשינגטאן מיט זיין זון.

אנקומענדיג אינעם לופטפעלד אין וואשינגטאן, האט דער קאנגרעסמאן פעט רייען אפגעווארט דעם סאטמארער רבי'ן פון קרית יואל. ביי די אנדערע פליגערס האבן די רבנים זיך אריינגעזעצט אין קארס אויפן וועג צום ווייסן הויז. אין די קאר האט דער באבובער רבי געבעטן זיינע מענטשן צו זינגען דעם ניגון "ותערב", זאגנדיג אז ווען מען זעט די הויפטשטאט פון די פעלקער דארף מען זיך דערמאנען אין ירושלים.

דערווייל, אינדרויסן פון די טויערן, האט ר' יואל ווערטהיימער פארטיילט קאלטע געטראנקען פונעם סאטמארער רבי'נס קאר פארן ציבור וואס איז געשטאנען און געווארט ביי די היצן.

נאך עטליכע פארשפעטיגונגען זענען אלע רבנים בשלום אנגעקומען און זענען שיין אויפגענומען געווארן דורך די באאמטע מיט קורצע פריוואטע שמועסן. די דעלעגאציע איז קודם אריין אינעם "רוזוועלט צימער", וואס איז גלייך נעבן דעם אוועל אפיס, וואו זיי זענען אויפגענומען געווארן דורך דעם באאמטן מרטין מארקעס. דארט האט דער עסקן יוסי געשטעטנער גערעדט א פאר ווערטער, און דערנאך האט דער באבובער עסקן יואלי ראזענפעלד קלאר פארגעשטעלט די טעמעס פונעם טאג: חינוך, אנטיסעמיטיזם, זיכערהייט, און דאס היטן אויף אידישע בית החיים אין אייראפע. דער סיגוטער רב האט אויך אויפגעטרעטן מיט קורצע ווערטער, און אינמיטן דעם האט זיך דער וויצע פרעזידענט קאנדידאט דזשיי. די. ווענס אנגעשלאסן אין די זיצונג.

דערנאך זענען זיי אריבער צום אפיציעלן צימער. די זיצונג איז געעפנט געווארן דורך א אידישער דירעקטאר אינעם ווייסן הויז. דער טיש איז געווען אויסגעשטעלט לויט דער ברייט. אין דער מיט איז געזעסן דער ווייסער הויז ראטגעבער פאר אידישע אנגעלעגנהייטן. צו זיין רעכטער זייט איז געזעסן דער סאטמארער רבי פון קרית יואל, און צו זיין לינקער זייט דער סאטמארער רבי פון וויליאמסבורג. נעבן אים איז געזעסן דער וויזשניצער רבי און דערנאך הרב אהרן מנחם מענדל טווערסקי. אויף דער רעכטער זייט, נעבן דעם סאטמארער רבי פון קרית יואל, איז געזעסן דער באבובער רבי, און בייים עק טיש איז געזעסן דער לעקוואודער ראש הישיבה ר' מלכיאל קאטלער.

שפעטער זענען די רבנים דירעקט אריין צום פרעזידענט אינעם אוועל אפיס. קאנגרעסמאן מייק לאולער, וועלכער איז אויך אנגעקומען צום מיטינג, האט זיי פארגעשטעלט און געזאגט פאר טראמפ אז דאס זענען די גרעסטע מנהיגים פונעם אידנטום.

דער סאטמארער רבי פון קרית יואל האט אנגעוואונטשן א ברכה פארן פרעזידענט, וואס דער עסקן ר' גדליה סגאנדין האט איבערגעזעצט אויף ענגליש. דער רבי האט אויפגעברענגט די נושא פון אידישע ארעסטאנטן, און ווען טראמפ האט דערמאנט זיין גרויסע שטיצע פאר מדינת ישראל, האט דער רבי  מעורר געווען איבער דעם גרויסן פראבלעם פון די גזירות הגיוס וואס מען וויל ארויפצווינגען אויף די ישיבה בחורים.

די זיצונג מיטן פרעזידענט האט אנגעהאלטן פאר בערך א האלבע שעה. פארדעם האט דער סאטמארער רבי פון קרית יואל געהאט א באזונדערע פריוואטע אסיפה פנים אל פנים מיטן פרעזידענט, וואס האט זיך פארצויגן פאר קרוב צו צען מינוט.

נאכן ענדיגן די באגעגעניש און ארויסגייענדיג פונעם צומער, האבן זיך האחים האדמו''רים מסאטמאר זיך באגריסט און געגעבן די הענט. באלד דערנאך זענען די רבנים זיך צעגאנגען, און אזוי איז די היסטארישע נסיעה געקומען צו א גוטע ענדע.