בס"ד

ראבאטן נעמען איבער די ארבעט: 'ראבאט-ערא' פירמע שטעלט ארויס מענטש-ענליכע ראבאטן אין כינעזע ווערהאוזעס צו סארטירן פעקעדזשעס

מענטש-ענליכע ראבאטן (Humanoid robots) רוקן זיך ארויס פון די לאבאראטאריעס און הייבן אן ארבעטן אין פאקטישע ווערהאוזעס. די פירמע 'ראבאט-ערא' (RobotEra) האט ארויסגעשטעלט אירע M7 מאשינען אין מער ווי 10 לאגיסטיק צענטערן וואס ווערן אנגעפירט דורך 'טשיינע פאוסט' און 'SF עקספרעס'.

די ראבאטן ווערן גענוצט צו סארטירן פעקעדזשעס אויף די אקטיווע קאנוועיער סיסטעמען, אריינגערעכנט דורכאויס די מאסיווע נאוועמבער 11 (11.11) שאפינג סעזאן אין כינע, וואס איז איינע פון די פארנומענסטע אנליין שאפינג צייטן אינעם לאנד.

לויט ווי די פירמע גיט איבער, האבן די M7 ראבאטן לכתחילה באוויזן צו סארטירן צווישן 800 און 900 פעקעדזשעס א שעה אין די פאקטישע ווערהאוזעס, וואס איז געווען שוואכער פון די 1,200 א שעה וואס זיי האבן באוויזן אין די לאבאראטאריעס. אבער נאכן זאמלען דאטא פון פאקטישע מענטשליכע ארבעטער און עס נוצן צו פארבעסערן די 'עי-איי' (AI) מאדעלן פון די ראבאטן, זאגט די פירמע אז די ראבאטן האבן דערגרייכט א שפיץ פון 1,500 פעקעדזשעס א שעה.

די מאשינען זענען אויך אויסגעשטעלט צו קענען באהאנדלען פארשידענע סארטן פעקעדזשעס, אריינגערעכנט קארדבאורד באקסעס, פלאסטישע דעליווערי זעקלעך, און פעקעדזשעס מיט אומגעווענליכע פארעמען. אין א ווידעא קען מען זען ווי עטליכע ראבאטישע איינהייטן נוצן זייערע הענט אויפצוהייבן, סקענען, און אוועקלייגן די פעקעדזשעס בעת זיי פארן אריבער אויף די קאנוועיער בעלטס אינעם ווערהאוז.

די שריט צייגט אן אויף כינע'ס פארשנעלערטע באמיאונגען אריינצוברענגען מענטש-ענליכע ראבאטן אין קאמערציאלע אינדוסטריעס, בפרט אין לאגיסטיקס, וואו די כסדר'דיגע סארטירן ארבעט גיט א גוטע געלעגנהייט צו טעסטן אטאמאציע אויף א גרויסן פארנעם. אנדערש ווי געווענליכע אינדוסטריאלע ראבאטן וואס זענען געמאכט פאר איין ספעציפישע באוועגונג, ווערן די מענטש-ענליכע ראבאטן אנטוויקלט זיך צו קענען צופאסן צו פארשידענע אביעקטן און טוישנדע ארבעטס-אומשטענדן מיט א פיל גרעסערע פלעקסיביליטעט.

דאס וואס די פירמע האט גענוצט דאטא פון מענטשליכע ארבעטער ווייזט אויך וויאזוי פאקטישע עקספיריענס קען העלפן פארבעסערן די ראבאטן פיל מער ווי אין א קאנטראלירטע לאבאראטאריע. לאגיסטיק פירמעס קענען שטארק הנאה האבן פון שנעלערע פעקעדזש פראסעסינג, ווייניגער אנגעוויזנקייט אויף מענטשליכע ארבעטער פאר שווערע ארבעט, און די מעגליכקייט צו ארבעטן לענגערע שעות. אבער, די באריכטעטע שפיץ פון 1,500 פעקעדזשעס א שעה מיינט נישט דוקא אז דאס איז די כסדר'דיגע סטאנדארט אין יעדע צייט אדער אין יעדע ווערהאוז. אויב די פראיעקטן וועלן זיך ווייטער אויסברייטערן און ווייזן גוטע רעזולטאטן, קענען די ראבאטן ווערן אן אפטערע ערשיינונג אין כינע'ס שנעל-וואקסנדע לאגיסטיק אינפראסטרוקטור.