שרעקליכע דראמא אין די לופטן: פליי-דובאי פליגער טראסקעט איבער 14 טויזנט פיס אין סעקונדעס נאך געשלעג אין קאקפיט

נייע פלייט-טרעקינג דאטא צייגט ווי נאנט א 'פליי-דובאי' פליגער איז געווען צו א קאטאסטראפע דעם מיטוואך אינדערפרי.

לויט די 'פלייט-ראדאר-24' סיסטעם, האט פלייט FZ1073, וואס האט געטראגן 174 פאסאזשירן - אריינגערעכנט 27 קינדער - פון דובאי קיין תל אביב, אראפגעטראסקעט אומגלויבליכע 14,125 פיס אין בלויז 29 סעקונדעס. דער פאל איז געווען אזוי שארף און שנעל, אז די פליגער איז אריין אין א כמעט-ווערטיקאלע דייוו.

די שרעקליכע סצענע האט זיך אנגעהויבן נאכדעם וואס דער קא-פילאט איז לויט באריכטן געווארן ווילד און אטאקירט דעם הויפט קעפטן, צווינגענדיג דעם פליגער אין א שארפע פאל בעת ער האט פארלוירן קאנטראל פונעם קאקפיט. פאסאזשירן האבן שילדערט א מצב פון טאטאלע פאניק און כאאס אין די קאבינע בשעת דער פליגער האט געצויגן אראפצו. לויט טייל באריכטן האבן 'אף-דוטי' פערסאנאל וואס זענען געווען אויפן פליגער געהאלפן צוריקבאקומען קאנטראל אינאיינעם מיט די מאנשאפט, כאטש די אידענטיטעט פון די וואס האבן אינטערווענירט איז נאכנישט אפיציעל באשטעטיגט געווארן.

טראץ די שרעקעדיגע איבערלעבעניש, האט זיך דער פליגער ענדליך סטאביליזירט און געלאנדעט אומגעשעדיגט אינעם טאבוק עירפארט אין סאודי אראביע, וואו סיי דער קעפטן און סיי דער קא-פילאט זענען אפגעפירט געווארן אין שפיטאל מיט וואונדן.

אוויאציע עקספערטן זאגן אז א פאל פון אזא פארנעם אין אונטער 30 סעקונדעס פאסירט געווענליך נאר ביי אן עמערדזשענסי פאל נאך א פארלוסט פון קאבינע פרעשור, וואס דאס אליין צייגט ווי געוואלדטאטיג דאס געשלעג אינעם קאקפיט האט געמוזט זיין. אויספארשער אין מדינת ישראל און אין סאודי אראביע גראבן יעצט דורך די פלייט דאטא, קאקפיט רעקארדירונגען און פאסאזשירן-עדות'שאפטן צו קענען רעקאנסטרואירן פונקטליך וואס עס האט זיך אפגעשפילט אין יענע קריטישע סעקונדעס.

דערווייל זענען אפיציעלע באאמטע פון אלע זייטן פאראייניגט איבער איין זאך: עס האט זיך געקענט ענדיגן פיל ערגער, און עס איז א ריינע נס וואס יעדער אויפן פליגער האט איבערגעלעבט.