שרעקעדיגע קאקפיט ווידעא: א פויגל קראכט אריין אין די ווינדשילד פון א פליגער רעכט בעפארן לאנדן

א נייע קאקפיט ווידעא צייגט דעם פונקטליכן מאמענט ווען א פויגל האט אריינגעקראכט אין די ווינדשילד פון א פליגער, און דאס האט פאסירט אין די ערגסטע מעגליכע צייט. דער פליגער איז געווען אינמיטן די לעצטע פאזעס פון לאנדן, א צייט וואס די פיילאטן זענען שטארק קאנצענטרירט צו האלטן דעם פליגער גראד צום ראנוועי, ווען פלוצלינג האט א פויגל אריינגעשמעטערט אינעם גלאז, איבערלאזנדיג א בלוטיגע פלעק אויף די רעכטע זייט.

דער קראך זעט אויס גאר שרעקעדיג, און די רעאקציע פונעם פיילאט צייגט ווי שטארק ער איז געווארן איבערראשט און דערשראקן זעענדיג דאס פאסירן ממש פאר זיינע אויגן. טראץ דעם אלעם, האבן ביידע פיילאטן אנגעהאלטן קאנטראל אויפן פליגער און געמאכט א סעיף לענדינג. אויב קוקט מען גוט אויף די ווידעא, קען מען זען אז די ווינדשילד האט אפילו נישט געקראכט.

דאס איז אבער נישט קיין צופאל. פליגער ווינדשילדס זענען ספעציעל געבויט פון עטליכע שיכטן גלאז וואס זענען דעזיינט איבערצולעבן פונקט אזעלכע קראכן. לויט די רעגולאציעס פון די פעדעראלע אוויאציע אגענטור (FAA), מוזן די ווינדשילדס פון גרויסע פליגערס קענען דערהייבן א קראך פון א 4-פונטיגע פויגל ביי א הויכע ספיד, כדי צו באשיצן די פיילאטן און די קאקפיט.

די טיימינג פון דעם אינצידענט איז אויך נישט קיין זעלטנהייט. סטאטיסטיקס ווייזן אז ארום 60 פראצענט פון פויגל קראכן מיט פליגערס פאסירן דורכאויס די צייט וואס דער פליגער נידערט אראפ אדער מאכט זיך גרייט צו לאנדן. דאס איז די סיבה פארוואס די עירליין אינדוסטריע און פיילאט טרעינינג פאקוסירן אזוי שטארק אויף איין ציל: האלטן דעם פליגער סטאביל און לאנדן סעיף, אפילו נאך אזא קראך.

דעריבער, דאס קומענדיגע מאל וואס איר זעט אזא שרעקעדיגע ווידעא און עס כאפט אייך א ציטער, געדענקט אז די גלאז איז ספעציעל געבויט פאר דעם, און די פיילאטן זענען פולשטענדיג טרענירט וויאזוי זיך צו באגיין אין אזא פאל.