בס"ד

שאקירנדע אינצידענט אין בערלין: פרא-פאלעסטינער אקטיוויסט קריכט ארויף אויף היסטארישן פאן-שטאנג אינדרויסן פונעם רייכסטאג און טוישט דעם דייטשן פאן צו א פאלעסטינער פאן

אן אומגעהערטער אינצידענט האט זיך אפגעשפילט זונטאג, נאוועמבער 8, אין בערלין, ווען א 22-יעריגער מאן האט ארויפגעקראכן אויף א 30-מעטער הויכע פאן-שטאנג אינדרויסן פונעם באקאנטן 'רייכסטאג' בנין, אראפגעריסן דעם ריזיגן דייטשן פאן און ארויפגעצויגן א פאלעסטינער פאן אויפן ארט.

לויט די ארטיגע פאליציי האט דער אינצידענט פאסירט ארום 11:15 אינדערפרי. דער יונגערמאן האט געהאט צוויי מיטארבעטער וואס זענען געבליבן שטיין אונטן און האבן רעקארדירט דעם גאנצן סצענע. דער פאן-שטאנג איז א היסטארישע נאציאנאלע מאנומענט, באקאנט אלס די "פאן פון פאראייניגונג", וואס צייכנט אפ די פאראייניגונג פון דייטשלאנד דעם 3'טן אקטאבער 1990. דער אפיציעלער דייטשער פאן וואס ער האט אראפגעווארפן צו דער ערד איז געוואלדיג גרויס, מעסטנדיג ארום 60 סקווער מעטער.

דער פאלעסטינער פאן האט געפלאטערט אין די הייך פאר מער ווי א שעה צייט, ביז דער אקטיוויסט איז אליינס אראפגעקומען ארום 12:30 נאכמיטאג. באלד דערנאך האט די לאקאלע פייער דעפארטמענט אראפגענומען דעם פאלעסטינער פאן ניצנדיג זייערע ספעציעלע עקוויפמענט.

די פאליציי האט באלד ארעסטירט אלע דריי פארשוינען און געעפנט אן אויספארשונג אויף פארדאכטן פון באליידיגן דאס לאנד און אירע סימבאלן. באריכטן געבן אן אז די אקטיוויסטן האבן דורכגעפירט דעם אקט אלס פראטעסט קעגן די דייטשע רעגירונג'ס שטיצע פאר מדינת ישראל און וואס זיי רופן אן איר "שטילקייט" איבער די מלחמה אין עזה.

דער אינצידענט איז באזונדער אויפפאלנד קומענדיג בלויז איין טאג בעפאר דעם טרויעריג-באקאנטן יארטאג פון 'קריסטאלנאכט', וואס מאכט דעם אקט נאך מער סענסיטיוו און אנגעצויגן.

דערווייל זענען די דריי בלויז פארדעכטיגטע און קיינער פון זיי איז נאכנישט אנגעקלאגט געווארן. דער פאל האט אבער ארויסגערופן א שטורעם אין לאנד, ווען פילע בירגער פרעגן ווי אזוי דער פארשוין האט בכלל באוויזן ארויפצוקריכן אויפן שטאנג אומגעשטערט, וואספארא שטראפן די פארדעכטיגטע קענען ערווארטן, און צי די פראקורארן וועלן טאקע אריינגעבן קרימינאלע קלאגעס קעגן זיי.