שוידערליכע באדינגונגען אין מיליטערישע באזעס: אמעריקאנער זעלנער שלאפן אין קארס און ליידן פון שימל

אמעריקאנער זעלנער לעבן אין שרעקליכע אומשטענדן, אריינגערעכנט שימל אין די שטיבער, זיין אן הייסע וואסער פאר א גאנצע יאר צייט, און טייל שלאפן אפילו אין זייערע קארס וויבאלד זייערע 'באראקס' האבן נישט קיין עיר קאנדישן. אזוי זאגט דעקאטע מאיער, א באקומער פונעם פרעסטיזשפולן 'מעדאל אוו האנאר'.

מאיער האט איבערגעגעבן די שוידערליכע דעטאלן פאר 'פאקס ניוז דידזשיטאל', נאכדעם וואס דער קריגס סעקרעטאר פיט העגסעט האט אים אויפגעשטעלט צו פאררעכטן דעם פראבלעם וואס ער רופט אן "צענדליגער יארן פון נאכגעלאזקייט". מאיער איז געווארן אויפגענומען אין אקטאבער אלס א הויפט ראטגעבער פאר די פענטאגאן'ס ספעציעלע 'באראקס טעסק פארס', און ער פארט יעצט ארום צו פארשידענע מיליטערישע באזעס איבערן לאנד צו אינספעקטירן די באראקס, זיך טרעפן מיט די זעלנער, און דערגיין פארוואס מען פאררעכט נישט די פראבלעמען. נאכן זען דעם מצב מיט זיינע אייגענע אויגן, זאגט מאיער אז בלויז געציילטע באראקס וואס ער האט באזוכט זענען אין א גוטן צושטאנד.

דער פראבלעם איז אבער נישט קיין נייע. א באריכט פון די 'גאווערנמענט אקאונטעביליטי אפיס' אין יאר 2023 האט שוין דאקומענטירט די פראבלעמען פון שימל, איבערגעפילטע סוערס, צובראכענע היצונג און קולער סיסטעמען, און אנדערע דורכפעלער אין די באראקס. דער באריכט האט אנגעוויזן אז די שוואכע באדינגונגען זענען שוין אזוי פאר צענדליגער יארן, טראץ פריערדיגע פרואוון עס צו פאררעכטן.

העגסעט האט געגרינדעט די טעסק פארס אין אקטאבער 2025, און האט געמאלדן אז די פענטאגאן לייגט אריין 1.2 ביליאן דאלאר צו פארבעסערן די צושטאנדן. מאיער האט עפנטליך דערקלערט אז ער וועט נעמען די פולע פאראנטווארטליכקייט און שולד אויב די ארבעט ווערט נישט געטון ווי עס דארף צו זיין. ער איז ערווארטעט צו באזוכן 21 באזעס ביז ענדע דעצעמבער.

די גרויסע פראגע איז יעצט צי די נייע איניציאטיוו וועט ענדליך ברענגען ריינע, זיכערע און באקוועמע וואוינונגען פאר די טרופן וואס געפונען זיך אין די געביידעס.