בס"ד

היסטארישע גניבה: צפון קארעא העקערס באגייען די גרעסטע קריפטא גניבה אין די היסטאריע, רויבנדיג 6.36 ביליאן דאלאר פון 'ביינענס'

צפון קארעא רעגירונג-געשטיצטע העקערס זענען אידענטיפיצירט געווארן אלס די הויפט פארדעכטיגטע אין א ריזיגע קריפטא-קארענסי גניבה פון ארום 6.36 ביליאן דאלאר וואס איז דורכגעפירט געווארן אויף די באקאנטע 'ביינענס' (Binance) עקסטשעינדזש. די בלאקטשעין שפיאנאזש פירמע 'TRM Labs' האט עס באצייכנט אלס די גרעסטע קריפטא גניבה וואס איז נאר אמאל רעקארדירט געווארן אין די היסטאריע.

די סייבער-אטאקע ווערט אנגעלייגט אויף די 'טרעידער-טרעיטאר' (TraderTraitor) העקער גרופע, א באנדע וואס איז שוין געווען פארמישט אין פריערדיגע גרויסע קריפטא גניבות, אריינגערעכנט די העקעריי אויף 'בייביט' אין פעברואר 2025. לויט 'TRM Labs', האבן די געגנבעטע פאנדן אנגעהויבן ווערן אריבערגעפירט דורך 10 פארשידענע בלאקטשעינס אום אקטאבער 29, ארום 20:05 UTC צייט, ווען רוב פון די טראנספערס זענען דורכגעפירט געווארן אין א קורצע צייט-אפשניט פון קוים 20 מינוט.

די שנעלקייט און פארנעם פון די טראנזאקציעס צייגט ארויס די שוועריגקייטן מיט וואס אויספארשער און קריפטא פלאטפארמעס ספראווען זיך ביים פרובירן נאכצוגיין און צוריקבאקומען געגנבעטע דיגיטאלע פארמעגנס. דער אינצידענט האט אויפגעוועקט פרישע זארגן איבער די וואקסנדע מעגליכקייטן פון רעגירונג-געשטיצטע סייבער-פארברעכער און די אלגעמיינע זיכערהייט פון די גרויסע קריפטא עקסטשעינדזשעס.

עטליכע גרויסע קריפטא פירמעס און בלאקטשעין ארגאניזאציעס, אריינגערעכנט טעדער (Tether), סירקעל (Circle), ריפל (Ripple), ווארלד ליבערטי פיינענשעל און ארביטרום'ס סעקיוריטי קאונסיל, האבן באוויזן צו פרירן ארום 2.7 ביליאן דאלאר אין פארמעגנס וואס זענען פארבינדן צו דעם אינצידענט. אבער, א געשאצטע 2.4 ביליאן דאלאר איז דערווייל אומגרייכליך, וואס אונטערשטרייכט ווי שווער עס איז אפצושטעלן פאנדן נאכדעם וואס זיי ווערן צושפרייט איבער עטליכע בלאקטשעין נעצן.

א קוואל נאנט צו די קעיס גיט איבער אז 'ביינענס' ארבעט אינאיינעם מיט די עף-בי-איי און די אמעריקאנער סיקרעט סערוויס צו אויספארשן די גניבה. די עקסטשעינדזש האט אויך געמאלדן אז זיי האבן אוועקגעלייגט מער ווי 6.34 ביליאן דאלאר פון זייערע אייגענע פירמע פאנדן צו דעקן דעם שאדן און האבן שוין אנגעהויבן די ארבעט צוריקצוקערן די פארלוירענע געלטער פאר די באטראפענע קאסטומערס. די אויספארשונג קאנצענטרירט זיך יעצט אויף נאכצוגיין די פארבליבענע פאנדן, צו דערגיין דעם פולן פארנעם פון די אפעראציע, און זען וויפיל פון די געגנבעטע קריפטא מען קען למעשה נאך ראטעווען.