ארגענטינער פרעזידענט כאוויער מילעי רייסט אראפ די יו-ען אין א פייערדיגע רעדע: "א נוצלאזע ארגאניזאציע"

דער ארגענטינער פרעזידענט כאוויער מילעי האט אפגעגעבן א פייערדיגע און שארפע רעדע אינעם יו-ען זאל, וואו ער האט אראפגעריסן די ארגאניזאציע און עס אנגערופן א "נוצלאזע" קערפערשאפט וואס ווערט אנגעפירט דורך "פאטאל-אראגאנטע פאראזיטן וועלכע פארשטעלן זיך ווי גוט-מיינענדיגע ביוראקראטן."

מילעי האט אנגעהויבן זיין רעדע מיט'ן אנערקענען אז די ארגינעלע צילן פון די יו-ען זענען געווען שיינע רייד איבער שלום און מענטשליכע ווערדן, אבער דערנאך האט ער סיסטעמאטיש צענומען זייער רעקארד. ער האט באשולדיגט די אינסטיטוציע אין שטיצן די פאנדעמיק לאקדאונס, וואס ער האט אנגערופן א סארט גענאסייד, און אין געבן שוץ פאר בלוט-דארשטיגע דיקטאטורן.

דערצו האט ער שארף פארדאמט די יו-ען פאר'ן כסדר שטימען קעגן מדינת ישראל בעת זיי שווייגן אינגאנצן איבער איסלאמישע טעראריזם. ער האט אויך אראפגעריסן די ארגאניזאציע פאר'ן פראמאטן אן עקסטרעמע אגענדע איבער קלימאט טויש, אומקאנטראלירטע אימיגראציע, און אנדערע לינקע פראגראמען.

דער ארגענטינער פירער האט פארענדיגט זיינע ווערטער מיט א ציטאט פונעם עקאנאמיסט לודוויג פאן מיזעס, זאגנדיג אז "גוטע מענטשן זוכן נישט צו קאנטראלירן די לעבנס פון זייערע מיטמענטשן."

די רעדע צייכנט אפ נאך א דירעקטע קאנפראנטאציע צווישן מילעי'ס רעגירונג און די גלאבאלע סיסטעם. עס לאזט איבער א פראגע צייכן צי אנדערע לענדער וועלן נאכטאן זיין ביישפיל און זיך אנשליסן אין די קריטיק, און צי די יו-ען וועט בכלל רעאגירן צו די שווערע באשולדיגונגען. פאליטישע אנאליסטן קוקן איצט ארויס צו זען וויאזוי די פובליק אראפרייס וועט אפעקטירן ארגענטינע'ס באציאונגען מיט די וועלט-ארגאניזאציע אויף ווייטער.