מדינת ישראל פרעמיער מיניסטער בנימין נתניהו האט מיטוואך אפגעשטאט א באזוך אויפן שפיץ פונעם בארג חרמון, אויף די סירישע זייט פונעם גרעניץ, וואו ער האט איבערגעגעבן א שארפע מעסעדזש דירעקט קעגן איראן, קורץ בעפארן אנקום פונעם נייעם יאר.

צוזאמען מיט אים זענען געווען פארטיידיגונגס מיניסטער ישראל כ"ץ און דער דעפיוטי טשיף אוו סטאף מעידזשאר דזשענעראל תמיר ידעי. די גרופע האט באקומען אן אפערעישאנעל בריפינג ביי א מיליטערישע פאזיציע וואס קוקט אראפ אויף סירישע טעריטאריע, איבערגעגעבן דורך די נארדערן קאמאנד הויפט מעידזשאר דזשענעראל רפי מילא און דער קאמאנדיר פון די 210'טע דיוויזיע בריגאדיר דזשענעראל יאיר פלאי.

שטייענדיג אויף איינע פון די מערסט סטראטעגישע פונקטן אינעם ראיאן, האט נתניהו אנגעוויזן אז מען קען פון דארט זען דמשק, לבנון און די סירישע גולן הייטס. ער האט דערקלערט אז מדינת ישראל האלט יעצט אן "אבסאלוטע קאנטראל" אויפן שטרעקע פונעם חרמון שפיץ ביזן ירמוך טייך און מערב זייט צום מיטלענדישן ים - א שטאפל פון קאנטראל וואס מען האט נאכנישט געזען ביז היינט.

נתניהו האט אראפגעלייגט דעם באזוך אלס א סימבאלישע און זיכערהייטס שריט, עס פארבינדנדיג צו וואס די מדינה פירער רופן די "מלחמת התקומה". ער האט געשוואוירן אז מען וועט נישט ערלויבן קיין שום פיינטליכע באוואפנטע קראפט זיך צו באזעצן ביים גרעניץ, אנווייזנדיג אויף די יעצטיגע שטארקע מיליטערישע אנוועזנהייט אינעם געגנט אלס איינע פון די הויפט דערגרייכונגען פון די קריג.

פון דארט איז ער אריבער צו רעדן דירעקט איבער איראן, זאגנדיג קלאר אז די הויפט אויפגאבע וואס ליגט יעצט פאראויס איז צו באזיגן דעם "טעראריסטישן רעזשים" אין טעהראן. נתניהו האט אויסגעדרוקט קאנפידענץ אז מען האלט שוין זייער נאנט צו דעם ציל, צולייגנדיג אז די ברייטערע נעץ פון איראנער-געשטיצטע טעראר גרופעס איבערן ראיאן וועט צום סוף אינגאנצן צוזאמפאלן.

דער טיימינג און שפראך פונעם באזוך קומט אין א צייט וואס אנדערע הויכראנגיגע באאמטע האבן אויך אפגעשטאט ענליכע באזוכן אויפן חרמון זינט די מיליטער האט איבערגענומען דעם שפיץ נאכן פאלן פונעם אסאד רעזשים. פארטיידיגונגס מיניסטער כ"ץ האט אפגעשטאט אן ענליכן באזוך ענדע אוגוסט, שיקנדיג שארפע ווארענונגען פאר דמשק און אנקארא אז די מיליטער פלאנט צו בלייבן אינעם געגנט.

די כסדר'דיגע באזוכן זענען געצילט צו שיקן א קלארע מעסעדזש אז די מיליטערישע אנוועזנהייט אין סיריע איז נישט קיין צייטווייליגע זאך, און אז דער בארג דינט אלס א סטראטעגישע פונקט פון וואו צו קאנטראלירן עטליכע פראנטן אויפאמאל. די ווערטער פון נתניהו קומען אין שאטן פון שפיאנאזש שאצונגען וואס ווארענען אז איראן גרייט זיך מעגליך פאר א ברייטע, מולטי-פראנט אטאקע וואס וועט ארייננעמען חיזבאללא, כאמאס, די חותים, און איראנער-געשטיצטע מיליציעס אין איראק - א סצענאר וואס באאמטע גלייכן צו צו די קאארדינירטע אטאקעס פון שמחת תורה.

צום שלוס האט נתניהו איבערגעגעבן וואונטשן פאר די בירגער און סאלדאטן לכבוד דעם נייעם יאר. אבער טראץ די יום טוב'דיגע וואונטשן, האבן זיינע ווערטער קלארגעמאכט אז די פירערשאפט זעט נישט קיין שום פויזע אין די מלחמה. מיט איראן אלס דער קומענדיגער הויפט ציל און די אנגעצויגנקייט וואס קאכט אין לבנון, סיריע און איבערן גאנצן מיטל מזרח, האט נתניהו'ס רעדע פונעם בארג חרמון זיך געליינט ווייניגער ווי א יום טוב מעסעדזש און מער ווי א קלארע דעקלאראציע אז די מלחמה גייט אן אין פולן קראפט אריין אינעם נייעם יאר.