פרעזידענט טראמפ אינדארסירט אפיציעל נתניהו פאר ווידערערוויילונג: "א גרויסער קעמפער"

פרעזידענט דאנאלד טראמפ האט אפיציעל אינדארסירט דעם מדינת ישראל פרעמיער מיניסטער בנימין נתניהו פאר ווידערערוויילונג אין די קומענדיגע פארלאמענטארע וואלן וואס קומען פאר דעם 27'סטן אקטאבער. אין זיין אינדארסמענט האט טראמפ באצייכנט נתניהו אלס א "גרויסער קעמפער פרעמיער מיניסטער" און אים געגעבן זיין "פולע און טאטאלע אינדארסמענט."

אין א לאנגע פאוסט אויף זיין 'טרוט סאשעל' פלאטפארמע, וואס איז געווען געוואנדן צו די איינוואוינער אין מדינת ישראל, האט טראמפ אויסגעלויבט נתניהו'ס שטארקייט, העלדישקייט און קלוגשאפט אין פנים פון שווערע אפאזיציע, אריינגערעכנט פון אינעווייניג אין לאנד אליינס. דער פרעזידענט האט אים אראפגעלייגט אלס אן אומפארגלייכבארער שותף אין זיך ספראווען מיט איראן, זאגנדיג אז די איסלאמישע רעפובליק איז שוין סיסטעמאטיש חרוב געווארן סיי מיליטעריש און סיי פינאנציעל.

טראמפ האט געווארנט אז אויב טעהראן טוישט נישט שנעל איר דירעקציע, וועלן די פאראייניגטע שטאטן און אירע אליאירטע גאר בקרוב "פארענדיגן די ארבעט". ער האט צוגעגעבן א קלארע ווארענונג, אז אויב מדינת ישראל וועט אויסוועלן סיי וועלכן אנדערן פירער אויסער נתניהו, וועט אמעריקע זיין געצוואונגען צו טון די איבערגעבליבענע ארבעט אליינס, עפעס וואס ער איז נישט צופיל גענויגט צו טון.

די אינדארסמענט קומט אן קוים ניין טעג בעפאר די וויילער גייען צו די וואלן, און אונטערשטרייכט טראמפ'ס שטעלונג אז נתניהו בלייבט קריטיש וויכטיג פאר די ווייטערדיגע אמעריקאנער-מדינת ישראל קאאפעראציע איבער די איראנע פאליסי. טראמפ האט אראפגעלייגט דעם לאנגיעריגן ליכוד פירער אלס דער איינציגסטער פערזאן וואס איז אומשטאנד אנצוהאלטן די נויטיגע שטארקייט נאך די פריערדיגע געמיינזאמע אטאקעס, וואס לויטן פרעזידענט האט דאס עלימינירט איראן'ס נוקלעארע סטראשע אין די נאנטע צוקונפט.

נתניהו האט זיך שנעל באדאנקט פאר טראמפ פאר די שטיצע, זאגנדיג אז די צוויי וועלן "פארענדיגן די מיסיע אינאיינעם." די שטיצע קומט אין א צייט פון אנגעצויגנקייט אין די מיטל מזרח ראיאן, און נאך לאנגע מאנאטן וואס טראמפ האט זיך צוריקגעהאלטן פון געבן אן אפיציעלע אינדארסמענט. די ארטיגע וויילער וועלן יעצט דארפן נעמען אין באטראכט די הויכראנגיקע אמעריקאנער אריינמישונג ווען זיי גייען באשליסן צי זיי זאלן צוריקקערן נתניהו צום מאכט אדער אויסוועלן א נייעם פירער אין אזא קריטישע צייט פארן מיטל מזרח.