דעמאקראטישער פירער האקים דזשעפריס מעלדט פולע שטיצע פאר אימפיטשמענט קעגן דעפענס סעקרעטערי פיט העגסעט

דער פירער פון די דעמאקראטישע מינאריטעט אין קאנגרעס, האקים דזשעפריס, האט זונטאג געמאלדן אז ער איז א "שטארקע יא אויף די העגסעט רעזאלוציע", מיט וואס ער ווארפט אריין זיין פולע וואג צו אימפיטשן דעם סעקרעטערי אוו דעפענס, פיט העגסעט. אין אן אינטערוויו מיט 'עי-בי-סי נייעס', האט דזשעפריס פאראויסגעזאגט אז עס וועט זיין "אומגלויבליך שטארקע שטיצע" צווישן די קאנגרעס דעמאקראטן ווען די פארטיי וועט עס אדורכרעדן אין זייער קאוקעס.

בלויז צוויי טעג פריער האט דזשעפריס אראפגעריסן העגסעט אלס "דער מערסט אומקוואליפיצירטער דעפענס סעקרעטערי אין די אמעריקאנער היסטאריע" און געזאגט אז ער דארף גיין, אבער ער האט זיך דעמאלט אפגעהאלטן פון אפיציעל שטיצן אימפיטשמענט, זאגנדיג אז ער וויל נישט לויפן פאראויס פון זיין קאוקעס.

די אימפיטשמענט רעזאלוציע ווערט ערווארטעט צו קומען פונעם רעפובליקאנער קאנגרעסמאן טאמעס מעסי. מעסי האט געזאגט פאר עי-בי-סי אז ער פלאנירט שוין אזוי פרי ווי מאנטאג צוריק אריינצוגעבן א פריווילעגירטע מאסנאמע מיט אכט ארטיקלען פון אימפיטשמענט. די ארטיקלען באשולדיגן העגסעט אין פארלעצן די 'וואר פאוערס רעזאלוציע' (מלחמה קראפטן געזעץ), צווישן אנדערע קלאגעס. די קריטיק פון די דעמאקראטן קעגן העגסעט איז בעיקר קאנצענטרירט ארום די איראנער מלחמה און אירע שווערע קאסטן.

מעסי האט ארגינעל אריינגעגעבן די אימפיטשמענט ארטיקלען נאך אין סעפטעמבער, אבער קאנגרעס האט זיך פרי פארמאכט און אפגעשטיפט דעם אפשטימונג. מעסי האט קלארגעשטעלט אז ער וועט נאר אפלאזן דעם קאמף אויב העגסעט רעזיגנירט. פון זיין זייט האט פרעזידענט טראמפ זיך אנגענומען פאר העגסעט, זאגנדיג אז ער "טוט א זייער גוטע דזשאב". וויבאלד די רעפובליקאנער קאנטראלירן נאך דעם קאנגרעס ביז יאנואר, קענען זיי פרובירן צו בלאקירן אדער אפלייגן די רעזאלוציע אין א זייט.

וואס עס וועט פאסירן ווייטער ווענדט זיך אין וויפיל רעפובליקאנער וועלן זיך אנשליסן מיט די דעמאקראטן, און צי העגסעט וועט אפטרעטן בעפאר. דער אפשטימונג וועט זיין א גרויסע פראבע צו זען ווי ווייט די נאכווייען פון די מלחמה נאך די מידטוירם וואלן דערגרייכן אריין אין טראמפ'ס קאבינעט.