בס"ד

לאס וועגאס: אידישע קהילות און מוסדות פארשטארקן זיכערהייט מיטלען אין ליכט פון אנגייענדע אנטיסעמיטיזם

אידישע מוסדות און קהילות אין לאס וועגאס האלטן אן א פארשטארקטע פאקוס אויף זיכערהייט, נאך וואס קהילה פירער זאגן אז אנטיסעמיטיזם איז ליידער געווארן א טעגליכע זארג ביים אידישן לעבנסשטייגער.

דריי יאר נאך די בלוטיגע שמחת תורה אטאקעס, זאגן לאקאלע עסקנים אז די סעקיוריטי אטמאספערע האט זיך דראסטיש געטוישט. בתי מדרשים און אנדערע קהילה צענטערן לייגן א ספעציעלע געוויכט אויף זיכערהייט ווען מען קומט זיך צוזאם פאר תפילות, פראגראמען און פובליק פארזאמלונגען.

די סטאטיסטיקס צייגן א קלארע בילד: אין יאר 2022 זענען רעקארדירט געווארן 30 אנטיסעמיטישע אינצידענטן אין נעוואדא, אבער דער ציפער האט ארויפגעשפרינגען צו 82 אין 2023. קהילה פירער ווייזן אן אז די הויכע ראטע האלט זיך ווייטער אן אין די לעצטע יארן, מיט 78 אינצידענטן באריכטעט אין יאר 2025.

די פחדים האבן אויך אן עפעקט אויף פריוואטע אידישע איינוואוינער. עסקנים באריכטן איבער פעלער וואו מענטשן טראכטן צוויי מאל צי זיי זאלן ארומגיין אפן אין די גאסן מיט אידישע לבוש אדער סימבאלן, און עס זענען אפילו געווען פעלער וואו טייל האבן אראפגענומען די מזוזות פון זייערע טירן צוליב מורא.

אלס רעזולטאט האבן אידישע מוסדות איבער גאנץ נעוואדא רעאגירט מיט'ן פארברייטערן זייערע סעקיוריטי צוגרייטונגען. דאס נעמט אריין פרישע אפשאצונגען אויף די געביידעס, סעקיוריטי טרענירונגען, און א נאנטע קאארדינאציע מיט פראפעסיאנאלע זיכערהייט עקספערטן.

ווי אויך איז יעצט דא א סעקיוריטי גרענט פראגראם וואס שטעלט צו פאנדן פאר אידישע ארגאניזאציעס אין נעוואדא צו קענען אויפנעמען מער סעקיוריטי פערסאנאל און מאכן פיזישע פארבעסערונגען צו בעסער באשיצן די מוסדות.

קהילה פירער האבן אונטערגעשטראכן אז עס איז דערווייל נישט דא קיין שום ספעציפישע סטראשע וואס צילט די לאס וועגאס אידישע קהילה, אבער זיי זאגן אז אנגייענדע וואכזאמקייט איז געווארן א וויכטיגע טייל פון באשיצן דאס אידישע לעבן. טראץ די פארמערטע זארגן, זאגן די ארגאניזאציעס אז די קהילה גייט אן ווי געהעריג און מען קומט זיך ווייטער צוזאם פאר אלע רעליגיעזע און קהילה אקטיוויטעטן אן קיין שטער.