א רוסישע מיליטערישע פליגער, וואס ווערט געווענליך באנוצט צו טראנספארטירן הויכראנגיקע רעגירונג באאמטע און מיליטערישע פערסאנאל, האט זונטאג אוונט, נאוועמבער 8, געמאכט אן אומגעווענליכע לאנדונג אינעם בן גוריון אינטערנאציאנאלן עירפארט אין מדינת ישראל, לויט א באריכט פון די ארטיגע 'קאן' נייעס אגענטור.

דער פליגער, א 'טופאלעוו Tu-154', האט זיך געהויבן פונעם טשקאלאווסקי לופט-באזע נעבן מאסקווע און האט געלאנדעט אין מדינת ישראל ארום 9:00 אזייגער ביינאכט לאקאלע צייט. די 'קאן' נייעס אגענטור האט באריכטעט אז דער פלייט איז לכתחילה אויפגעכאפט געווארן דורך א פלייט-טרעקינג עפפ, און שפעטער האבן זיי באקומען ווידעא קליפס וואס צייגט דעם פליגער ביים עירפארט.

די אומגעראכטענע ערשיינונג האט געצויגן גרויס אויפמערקזאמקייט, וויבאלד אזעלכע רוסישע מיליטערישע פלייטס צום בן גוריון עירפארט זענען נישט רעקארדירט געווארן אין די לעצטערע יארן. דערווייל איז אבער א גרויסע סוד ווער עס איז געווען אויפן פליגער און וואס די ציל פון די מיסיע איז. די מדינת ישראל מיליטער, די אפיס פונעם פרעמיער מיניסטער און די רוסישע אמבאסאדע האבן אלע אפגעזאגט צו קאמענטירן דערוועגן ווען מען האט זיי געפרעגט איבער דעם פלייט.

דער מיסטעריעזער באזוך קומט אין א צייט פון אנגעצויגענע ראיאנישע שפאנונגען און פארשידענע דיפלאמאטישע און זיכערהייט אנטוויקלונגען צווישן מדינת ישראל, רוסלאנד און איראן. די 'דזשערוסעלעם פאוסט' האט אידענטיפיצירט דעם פליגער אלס א Tu-154M וואס ווערט אפערירט דורך די 223'סטע פלייט יוניט פונעם רוסישן פארטיידיגונגס מיניסטעריום. די דאזיגע אפטיילונג איז ארויפגעשטעלט געווארן אויף די אמעריקאנער סאנקציעס ליסטע אין יאר 2023 פארן געבן הילף פאר די טרויעריג-בארימטע 'וואגנער גרופע'.

די פאקטן לייגן צו נאך א שיכט פון מיסטעריע צו די אומגעווענליכע לאנדונג, כאטש עס איז נישט דא קיין שום באווייז אז דער פליגער האט געטראגן וואגנער פערסאנאל אדער עקוויפמענט אויף די יעצטיגע רייזע. טייל עקספערטן קלערן אז דער פלייט האט מעגליך א פארבינדונג צו די לעצטיגע דיפלאמאטישע אדער זיכערהייט אנטוויקלונגען, אבער קיין שום אפיציעלע באשטעטיגונג איז נאכנישט געגעבן געווארן. לויט 'קאן', איז ערווארטעט אז דער פליגער זאל פארלאזן מדינת ישראל מאנטאג, אבער די ווייטערדיגע פלענער און די אידענטיטעט פון די פאסאזשירן בלייבן אומקלאר. ביז ווילאנג די מדינת ישראל אדער רוסישע אויטאריטעטן וועלן נישט געבן קיין אפיציעלע ערקלערונג, בלייבט די סיבה אונטער דעם מיליטערישן פלייט אן אפענע פראגע.