איראן לייקנט באריכטן איבער א געפלאנטע מיטינג צווישן ווייס פרעזידענט דזשעי. די. ווענס און הויכראנגיקער איראנער אפישעל אין קאטאר

די איראנער 'טאסנים' נייעס אגענטור האט אפגעלייקנט די באריכטן אז קאטאר ארבעט צו סקעדזשועלן א מיטינג קומענדיגע וואך אין דאכא, צווישן דעם אמעריקאנער ווייס פרעזידענט דזשעי. די. ווענס און מאכסען רעזאי, דער סעקרעטאר פון איראן'ס העכסטע נאציאנאלע זיכערהייט קאונסיל.

די אפלייקענונג קומט אין דירעקטע קאנטראסט צו די ווערטער פונעם טערקישן אינטעלידזשענס הויפט, איבראהים קאלין, וועלכער האט געזאגט אז קאטאר פרובירט צוזאמצוברענגען די צוויי אפישעלס אלס טייל פון די באמיאונגען פאראויסצורוקן פארהאנדלונגען צווישן וואשינגטאן און טעהראן.

קאלין האט אראפגעלייגט די פארגעשלאגענע מיטינג אלס א פאטענציעלע געלעגנהייט צו מאכן פראגרעס אין די דיפלאמאטישע געשפרעכן, וואס גייען אן אינמיטן די שווערע אנגעצויגנקייט איבער איראן און די ריזיקע פון פרישע מיליטערישע אקציעס. זיינע ווערטער האבן אנגעדייט אז ראיאנישע פארמיטלער פרובירן צו עפענען א דירעקטע קאנאל צווישן הויכראנגיקע אמעריקאנער און איראנער פארשטייער. אבער מיט די דענייעל פון טאסנים, בלייבט די באריכטעטע מיטינג אומבאשטעטיגט, און דערווייל איז נישט דא קיין עמטליכע אגרימענט אדער א פיינעל סקעדזשועל פון קיין איינע פון די צוויי זייטן.

אין די זעלבע צייט האט קאלין אויך פארציילט אז דער טערקישער פרעזידענט רעסעפ טאיפ ערדואן האט געדרוקט אויף פרעזידענט דאנאלד טראמפ, דורכאויס א טעלעפאנישע געשפרעך שבת, אז אמעריקע זאל זיך צוריקהאלטן פון אונטערנעמען פרישע אטאקעס קעגן איראן. לויט קאלין, האט ערדואן געווארנט אז נאך אן אמעריקאנער אטאקע קען פירן צו א פרישע סייקעל פון געוואלדטאטן און קען נאך מער דעסטאביליזירן דעם ראיאן.

די ווערטער אונטערשטרייכן טערקיי'ס באמיאונגען צו שטיצן דיפלאמאטיע, בעת די לענדער אינעם מיטל-מזרח זוכן צו פארמיידן נאך אן עסקאלאציע. קאטאר האט שוין געשפילט א ראלע אלס פארמיטלער אין די קאנטאקטן צווישן וואשינגטאן און טעהראן, און פריערדיגע באריכטן האבן שוין אויך ארומגערעדט איבער די מעגליכקייט פון א ווענס-רעזאי מיטינג אלס טייל פון א ברייטערע דיפלאמאטישע איניציאטיוו.

דאך ווייזן די קאנפליקטינג סטעיטמענטס ווי אומקלאר די יעצטיגע פארהאנדלונגען זענען. צו דאכא וועט טאקע האסטן דירעקטע געשפרעכן קומענדיגע וואך ווענדט זיך יעצט אויב די רעגירונגען וועלן עס באשטעטיגן און אויב ביידע זייטן זענען גרייט פאראויסצוגיין דערמיט.