בארא פארקער ביזנעסמאן באנייט זיין 30 מיליאן דאלאר ביד אפצוקויפן 'ארקיע עירליינס' און אפצושטעלן די שבת פלייטס
גאלערי
בארא פארקער ביזנעסמאן ר' עזרא אונגאר גיט אריין א פרישע 30 מיליאן דאלער אפער אפצוקויפן די 'ארקיע' עירליין כדי אפצושטעלן חילול שבת
דער היימישער בארא פארקער ביזנעסמאן ר' עזרא אונגאר האט אריינגעגעבן א באנייטע אפער פון 30 מיליאן דאלער אפצוקויפן די מדינת ישראל 'ארקיע' עירליין, מיטן הויפט ציל אפצושטעלן די פליגערס פון פליען אום שבת קודש.
אונגאר, א 36-יעריגער ריעל עסטעיט אנטרעפרענור, האט דעם פארגאנגענעם פרייטאג פרעזענטירט דעם איבערגעמאכטן פארשלאג פאר די פארטרעטער פון די ארבייטער אינעם קאמפאני, לויט ווי עס ווערט באריכטעט דורך 'כלכליסט' און 'וויינעט'.
אונטער דעם נייעם פארשלאג, וועלן די ארבייטער אנהאלטן ארום 3 פראצענט אייגנטומערשאפט אין די קאמפאני, זיי וועלן באקומען א זיץ אינעם 'באורד אוו דירעקטארס', און וועלן באקומען א ספעציעלע שוץ קעגן ווערן אויפגעזאגט פון די ארבעט (לעיאפס).
די פרישע אפער קומט אין א צייט וואס די ארקיע עירליין פלאגט זיך מיט שווערע פינאנציעלע קריזיסן, בעת וואס די יעצטיגע אייגנטומער זענען אינמיטן פארהאנדלען אן אנדערע אפמאך מיט אנדערע קויפער.
עס בלייבט דעריבער אומקלאר צי אונגאר'ס אפער וועט אנגענומען ווערן, און קיין ענדגילטיגע אגרימענט איז דערווייל נאכנישט געמאלדן געווארן.