איבער א ביליאן דאלאר א יאר: די אסטראנאמישע קאסטן צו באשיצן אידישע מוסדות און בתי מדרשים אין אמעריקע

די קאסטן פון באשיצן אידישע לעבנס און צענטערן אין די פאראייניגטע שטאטן האט איבערגעשטיגן די אסטראנאמישע סומע פון א ביליאן דאלאר א יאר. טויזנטער בתי מדרשים, מוסדות און אנדערע קהילה צענטערן זענען היינט געצווינגען צו ספענדן ריזיגע סומעס געלט בלויז צו האלטן זייערע געביידעס און די קאמיוניטי זיכער.

לויט נייע דאטא וואס איז ארויסגעגעבן געווארן דורך די 'דזשואיש פעדערעישאן אף נארט אמעריקע' (JFNA), שאצט מען די יערליכע סעקיוריטי קאסטן אויף ארום 1.015 ביליאן דאלאר איבער מער ווי 4,500 אידישע קהילה אינסטיטוציעס. דאס רעכנט אריין בתי מדרשים, מוסדות, קאמיוניטי צענטערן, זומער קעמפס און אנדערע נאן-פראפיט ארגאניזאציעס. דאס קומט אויס צו ארום 225,000 דאלאר פער מוסד, וואס איז א שארפע 33 פראצענט העכערונג פונעם פריערדיגן שאצונג פון 765 מיליאן דאלאר אין יאר 2024.

די ביליאן-דאלארדיגע ציפער נעמט אריין געלטער וואס קומען פון סיי פובליק און סיי פריוואטע קוואלן. די גרעסטע טייל פון די הוצאות גייט פאר סעקיוריטי פערסאנעל, אריינגערעכנט וועכטער און סעקיוריטי דירעקטארן. די שאצונג איז צוזאמגעשטעלט געווארן באזירט אויף פעדעראלע גראנט דאטא, אינפארמאציע פון מוסדות און סטאנדארטן אין די סעקיוריטי אינדוסטריע.

אבער אפילו די ריזיגע סומע פון 1.015 ביליאן דאלאר שטעלט נאך אלץ נישט פאר די פולע בילד פון די קאסטן צו באשיצן דאס אידישע לעבן. דער אנאליז רעכנט בכלל נישט אריין פריוואטע אידישע ביזנעסער, וואס נעמט אריין מער ווי 1,600 כשר'ע רעסטוראנטן, ארום 500 כשר'ע גראסעריס און סופערמארקעטס, ווי אויך ספרים געשעפטן און יודעיקא סטארס.

די וואקסנדע הוצאות קומען אין א צייט וואס אידישע מוסדות איבער'ן גאנצן לאנד אינוועסטירן אלס מער און מער אין וועכטער, קאמערעס און סעקיוריטי סיסטעמען, פארשטארקטע טויערן, סעקיוריטי דירעקטארן, טרעינינג און אנדערע שוץ-מיטלען, אין ליכט פון די אנגייענדע סטראשונגען און אנטיסעמיטישע אטאקעס.

דער פרעזידענט און הויפט פון די JFNA, עריק פינגערהוט, האט ארויסגעברענגט אז די שארפע העכערונג צייגט דעם שווערן לאסט וואס פאלט אויף די אידישע קהילות. ער האט אנגעוויזן אז דאס געלט וואס ווערט אויסגעגעבן אויף וועכטער און קאמערעס קומט דירעקט אויפן חשבון פון אידישע חינוך, הילף פאר עלטערע אידן און אנדערע וויכטיגע געברויכן פון די קאמיוניטי.

די ארגאניזאציע פאדערט יעצט פאר מער פעדעראלע הילף, אריינגערעכנט פולע פאנדינג פאר די 'נאן-פראפיט סעקיוריטי גראנט פראגראם', בעת אידישע קהילות פלאגן זיך ווייטער מיט די אסטראנאמישע קאסטן פון באשיצן בתי מדרשים, מוסדות און אנדערע צענטערן איבער'ן לאנד.