אלטע ווידעא מאכט א קאמבעק: פרא-פאלעסטינער פראטעסטירער הענגען א ריזיגן פאן אויפ'ן בארימטן 'טורעם פון פיזא' אין איטאליע

אין די לעצטע טעג דרייט זיך ארום א ווידעא אויף די סאציאלע מידיא נעצן וואס ווייזט ווי פרא-פאלעסטינער פראטעסטירער הענגען אראפ א ריזיגן פאלעסטינער פאן פונעם היסטארישן 'טורעם פון פיזא' (Leaning Tower of Pisa) אין איטאליע. אבער כאטש עס זעט אויס ווי א פרישע פראוואקאציע אדער א שרעקעדיגע איסלאמישע פלאט, איז דער אינצידענט באמת פארגעקומען פאראיאר, פרייטאג נאוועמבער 17, 2023.

יענעם טאג האבן ארום 15 איטאליענישע סטודענטן באוויזן זיך אדורכצושווערצן די סעקיוריטי ביים בארימטן טוריסטן-אטראקציע. זיי זענען ארויף אויפ'ן טורעם און אראפגעלאזט דעם ריזיגן פאן, אינאיינעם מיט רויך-באמבעס אין די קאלירן פון רויט, גרין און שווארץ. די גאנצע אקציע האט געדויערט בלויז עטליכע מינוט בעפאר זיי זענען צוריק אראפגעקומען.

לויט די ארטיגע פאליציי, האבן די סטודענטן אויסגענוצט א פרידליכע מארש פון ארום 500 מענטשן וואס זענען דורכגעגאנגען דעם צענטער פון שטאט יענעם אינדערפרי, פאדערנדיג א פייער-אפשטעל אין עזה. די איטאליענישע מידיא האט אנגעוויזן אז די גרופע באשטייט פון לינקע, אנטי-קאפיטאליסטישע סטודענטן. באאמטע האבן באשטעטיגט אז דער טורעם האט נישט געליטן קיין שום שאדן, און דער אינצידענט האט זיך געענדיגט רואיג אן קיין פארוואונדעטע.

טראץ וואס די פאקטן צייגן קלאר אז עס רעדט זיך פון א קליינע סטודענטן-פראטעסט קעגן מדינת ישראל'ס באמבארדירונגען אין עזה, און נישט פון קיין טעראר אקציע, האט דער אינצידענט איבערגעלאזט ערנסטע פראגעס. די הויפט קשיא איז: ווי אזוי האט א גרופע פראטעסטירער באוויזן אדורכצוגיין די שטרענגע סעקיוריטי קאנטראלן ביי איינע פון די מערסט-באוואוסטע לענדמארקס אויף דער וועלט?

די פאליציי האט דעמאלטס געמאלדן אז זיי וועלן נוצן די סעקיוריטי קאמעראס צו אידענטיפיצירן די פארברעכער. ענליכע פראוואקאציעס מיט פאלעסטינער פענער זענען שוין דורכגעפירט געווארן ביי אנדערע באוואוסטע ערטער איבער דער וועלט.

דעריבער, בעפאר איר טיילט ווייטער די וויירעל ווידעא פונעם פיזא טורעם, מאכט זיכער צו קוקן אויפ'ן דאטום – ווייל עס איז אן אלטע געשיכטע פון יאר 2023.