נישט קיין חילוק וואו דער איד וואוינט, איז זיין לעבן געשטערט געווארן דורך די קאראנא וויירוס, אויף א שטארקע פארנעם. עס האט ממש געטוישט די וועג וויאזוי מיר לעבן, מילד גערעדט

דעם פארלאפענע חול המועד, האט דרשו פרעזענטירט א ספעציעלע טעלע קאנפערענץ וואו גדולי תורה פון איבער די וועלט האבן אדרעסירט בני תורה, און איבערגעגעבן דברי חיזוק, און מיטגעטיילט וויאזוי מען דארף קוקן פון די תורה'דיגע פרעספעקטיוו בשעת מען גייט אדורך דעם גלאבאלע קריזיס.

דער קאנפערענץ איז אדרעסירט געווארן דורך הגאון רבי ירוחם אלשין שליט"א ראש ישיבת בית המדרש גבוה; הגאון רבי נסים קאפלאן שליט"א ראש ישיבת דעת אהרן; הגאון רבי אברהם ערענטראו שליט"א רב ביהמ"ד זכרון בנימין, און ר"מ בישיבת ווילרייק, אנטווערפן; הגאון רבי אשר דרוק שליט"א מגי"ש מפורסם בירושלים, און אויך דער נשיא פון דרשו, רבי דוד האפשטאטער שליט"א. עס איז אנגעפירט געווארן דורך רבי אליעזר רלב"ג שליט"א.

רבי ניסן קאפלאן: מיר דארפן זיך האלטן פעסט אין אונזערע שטובער

אין זיינע ווערטער, האט רבי ניסן קאפלאן ערקלערט די אייגענארטיגע מצב אין וואס מיר געפינען זיך יעצט. "דורכאויס היסטאריע, האבן מיר מיטגעלעבט געפערליכע גזירות. זאל עס זיין די קרייצוגלער, די אינקוויזיציע, די נאציס, און פיל נאך. דאס אלעס איז געווען גזירות וואס מיר האבן געליטן פון די הענט פון אנדערע. דער אייבערשטער האט געשיקט שלוחים אויסצופירן די גזירות, אבער היינט איז עס גאר אנדערש. עס איז דער אייבערשטער אליינס, וועלכער האט באשלאסן אז מען דארף פארמאכן אונזערע ישיבות, און אונזערע בתי מדרשים! עס איז נישט דא קיין רדיפות הדת, נאר דער אייבערשטער טוט עס. מיין רבי, הגאון רבי אשר אריאלי שליט"א, האט געזאגט אז עס איז גאר א זעלטענע זאך, און עס ווייזט אז דער אייבערשטער טוט יעצט עפעס גאר אנדערש פון וואס ער האט געהאט געטוהן אין אנדערע גליות.

הרב קאפלאן האט עס צוגעשטעלט צו וואס די גמרא דערציילט אויף טיטוס הרשע, וועלכער האט זיך איינגערעדט אז ער וועט פירן די וועלט, און ער וועט אייננעמען דעם אייבערשטן. "וואס האט דער אייבערשטער געטוהן? ער האט געשיקט א קליינטישקע פליג, ממש קליין, וואס מען האט קוים געקענט זעהן, און דער פליג איז אריין אין זיין נאז, און עווענטועל אין זיין מח און דאן אים געהרג'ט.

"דער אייבערשטער ווייזט אז אויב ער וויל, קען ער שיקן די קלענסטע באקטעריע און איבערדרייען די וועלט, און וועט איבערלאזן די אלע שטאלצע פירער און סייענטיסטן הילפלאז".

רבי ירוחם אלשין: דער כח פון שרייען צום אייבערשטן!

רבי ירוחם אלשין האט געגעבן א גאר רירנדע דרשה. עטליכע מאל איז זיין קול געווארן געשטיקט פון התרגשות, און מען האט קלאר געקענט שפירן די פיין וואס אחינו בני ישראל גייען יעצט אדורך.

ער האט ארויסגעברענגט די וויכטיגקייט פון תפילה. ער האט נאכגעזאגט די ווערטער פון דער רמב"ן אז "די אידן אין מצרים זענען נישט געווען ראוי צו ווערן אויסגעלייזט. אויב אזוי שטעלט זיך די פראגע, פארוואס האט דער אייבערשטער זיי אויסגעלייזט? צוליב איין סיבה. ווייל זיי האבן געשריגן צו אים מיטן גאנצן הארץ. 'ויצעקו' - זיי האבן געשריגן! זייער געשריי איז ארויף צום אייבערשטן און ער האט עס אנגענומען. 

"דאס איז דער יסוד פון יציאת מצרים. דאס איז די קריטישע זאך וואס איז אזוי וויכטיג יעצט אין אונזער עת צרה. ווען כלל ישראל שרייט צום אייבערשטן פון צער און גיסט זיך אויס דאס הרץ, דאן באקומען מיר א כח, די כח פון גאולה!"

רבי דוד האפשטאטער: זיך דערווייטערן פון גוי'אישע קולטור

רבי דוד האפשטאטער, דער נשיא פון דרשו, האט זיך באצויגן צו דער ענין וואס האט איבערגענומען די וועלט אז איינער דארף שטיין ווייט פונעם צווייטן. "מיר האבן אדורכגעלעבט א יום טוב פסח איינגעשפארט אין שטוב. די שולן פארמאכט, די בתי מדרשים פארשלאסן, און די חדרים זענען צוגעמאכט.

"דאס איז נישט געווען די ערשטע פסח וואס כלל ישראל האט מיטגעהאלטן פארשלאסן אינדערהיים", האט הרב האפשטאטער געזאגט מיט פאטאס. "די סאמע ערשטע פסח, האט דער אייבערשטער באפוילן די בני ישראל אז זיי דארפן בלייבן פארשלאסן אין זייערע שטובער, 'אל יצא איש מפתח ביתו', אז דער מלאך המשחית זאל זיי נישט קענען אטאקירן. דאס איז געווען די איינציגסטע וועג די בלוט פון די קרבן פסח האט אונז געקענט באשיצט, צוזאמען מיט די דם מילה. 

"דם פסח באדייט מסירות נפש - זיך אפטיילן גענצליך פון די פאלשע השקפות. די שעפעלע וואס איז דאך פון די עבודה זרה אין מצרים איז באשטימט געווארן אז מען זאל שחט'ן פארנט פון זיי מיט מסירות נפש, צו ווייזן אונזער התבטלות צום אייבערשטן פאר יעדע קאסט. די בלוט פון מילה באדייט די מסירות נפש און די גרייטקייט אוועקצוגיבן אלעס פארן אייבערשטן.

"פילייכט איז טאקע וויכטיג פאר אונז צו פראקטיצירן 'סאושעל דיסטענסינג', ווי עס ווערט גערופן, אין די יעצטיגע צייט, זיך אפצוטיילן פון די גוי'ישע השקפות וואס האט זיך ליידער אנגעהויבן אריינצוכאפן בתוכינו? אפשר דארפן מיר איבערטראכטן די וועג וויאזוי מיר לעבן, די וועג וויאזוי מיר פייערן אונזערע שמחות, די געפערליכע אויסברוך פון תענוגי עולם הזה, אפילו אין די ערליכע שטובער, און אפשר האט דאס געפירט צו א 'סאושעל דיסטענסינג', און מיר דארפן יעצט זיך איברקלערן און זאגן פארן אייבערשטער אז מיר קענען אליינס זיך דערווייטערן פון די גוי'ישע גאס און האלטן הייליג און ריין אונזערע געמיינדעס".

דער אייבערשטער זוכט א קשר מיט זיינע קינדער

הרב אברהם ערנטראו האט דאן געזאגט זיין דרשה פארנט פון די ארון הקודש אין זיין בית המדרש אין אנטווערפן.

"וואס דארפן מיר זיך מתבונן זיין אין אזא צייט?", האט ער געפרעגט. "דער אייבערשטער וואס איז דער מקור החסד און רחמים, וויל אונז חלילה נישט שעדיגן, אבער צומאל איז דאס די איינציגסטע וועג וויאזוי מען קען ארויסברענגען א מעסעזש, פונקט וויאזוי צומאל היילט מען א קינד דורך דעם וואס מען גיבט אים א וואקסין. אזויפיל פון אונזערע מענטשן זענען געווארן אזוי צוגעבינדן צו זייערע טעלאפאנען און אנדערע כלים, אז עס איז געווארן שווער צו טרעפן אן ארט אין אונזער הארץ און מח פארן אייבערשטן. אפשר האט דער אייבערשטער אונז געוואלט ווייזן, און זאגן, 'מיינע קינדער, איך וויל זיין מיט אייך. דעם יום טוב וויל איך בויען א קשר מיט אייך, א קשר מיט יעדע איד. דו דארפסט נישט וויסן יעדע קליינע שטיקעלע נייעס וואס פארט ארום. עס איז נישט ממש וויכטיג"

דער שליסל צו יעדע איד: שמחה!

נאך א שטארקע דרשה איז געזאגט געווארן דורך הרב אשר דרוק שליט"א, א מגיד שיעור מפורסם אין ירושלים. הרב דרוק האט ארויסגעברענגט אז עס איז גאר וויכטיג אין די יעצטיגע מצב אז מען זאל זיך נישט שפירן אז מען איז חלילה פארלוירן.

"דער אייבערשטער וויל א יעדע איד, נישט קיין חילוק וועלכע מצב ער איז, אז ער זאל זיך פארבעסערן זיין לעבן. יעדער איז אנדערש. פאר איינער וועט זיך פארבעסערן מיינען בין אדם לחבירו, און ביי א צווייטן וועט עס זיין חיזוק אין לימוד התורה. פאר א דריטן וועט זיין אין די עבודת התפילה, און פאר א פערטן וועט עס זיין אין שמירת הלשון, און אזוי ווייטער. מיר דארפן זיך מאכן א חשבון הנפש", האט ער פארזיכטיג פארגעזעצט, "עס זאל נישט ווערן געטוהן מיט עצבות, נאר ליבערשט מיט חשק און פלייס. דער שליסל איז צו גיין מיט א פעסטקייט, מיט שמחה, אקעגן משיח

די דרשו טעלעקאנפערענץ, איז רעקארדירט געווארן, און מען קען עס איבערשפילן אויף די 'תורה-עניטיים' פראגראם.