סומאטוכע אין ארץ ישראל: עדיוקעישאן מיניסטער סוספענדירט נאציאנאלע עקזאמענס נאך שוואכע רעזולטאטן

דער ארץ ישראל'דיגער עדיוקעישאן מיניסטער, יואב קיש, האט ארויסגעגעבן א באפעל צייטווייליג אפצושטעלן די נאציאנאלע סטאנדארטיזירטע עקזאמענס אין די שולעס איבער'ן לאנד, נאכדעם וואס די סטודענטן האבן געוויזן גאר שוואכע רעזולטאטן. דער שריט האט ארויסגערופן א שארפן קאנפליקט מיט די רעגירונג אגענטור וואס איז פאראנטווארטליך צו פירן די טעסטס.

דער באשלוס, וואס איז געמאלדן געווארן דינסטאג אקטאבער 20, אפעקטירט די אזוי-גערופענע "מיצ"ב" טעסט סיסטעם, וואס מעסט די אקאדעמישע קענטעניסן פון קינדער אין די עלעמענטרי און מידל סקולס אין פאכן ווי העברעאיש, מאטעמאטיק און סייענס.

אין א דראסטישן שריט האט דער מיניסטער קיש אויך ארויסגעווארפן די באאמטע פון די 'ראמ"ה' אגענטור (די נאציאנאלע אויטאריטעט פאר מעסטן און אפשאצן עדיוקעישאן) און זיי פארבאטן אריינצוקומען אין די אפיסעס פונעם עדיוקעישאן מיניסטעריום. דאס האט נאך מער אנגעצויגן די שטרייט צווישן דעם מיניסטער און די זעלבסטשטענדיגע אגענטור.

די גאנצע סומאטוכע קומט נאכדעם וואס די לעצטיגע טעסט רעזולטאטן זענען פובליצירט געווארן און האבן אויפגעדעקט גרויסע שוואכקייטן אין די אקאדעמישע פערפארמענס פון די שילער. אנשטאט אנצוגיין מיט די יעצטיגע סיסטעם, טענה'ט קיש אז מען מוז מאכן טוישונגען און רעפארמען אין די עקזאמענס, ווייל די יעצטיגע טעסטס געבן נישט קיין קלארע און פונקטליכע בילד פון די עדיוקעישאן סטאנדארטן.

זיין באשלוס האט אבער געצויגן שארפע קריטיק, ספעציעל נאכדעם וואס אן אומאפהענגיגע איבערזיכט האט קלארגעשטעלט אז עס איז נישט דא קיין שום סיבה צו צווייפלען אין די קראנטקייט פון די רעזולטאטן, כאטש זיי האבן יא אנגעוויזן אויף געוויסע קליינע פראבלעמען מיט די וועג וויאזוי די רעזולטאטן זענען פרעזענטירט געווארן.

די פלוצלינגדיגע סוספענדירונג ברענגט ארויף ערנסטע פראגעס וויאזוי די שולעס און עדיוקעישאן באאמטע וועלן קענען האלטן א חשבון אויף די פראגרעס פון די קינדער דערווייל. לויט באריכטן אין די ארטיגע מידיא, איז א נאציאנאלע מאטעמאטיק טעסט געווען געסקעדזשולד אויף נאוועמבער 25, אבער די נייע דירעקטיוו פונעם מיניסטער האט איבערגעלאזט אומקלארקייט איבער די גאנצע סקעדזשול.

פאר עלטערן און מחנכים איבער ארץ ישראל איז די הויפט פראגע צי די פארגעשלאגענע טוישונגען וועלן טאקע ברענגען א פאזיטיווע טויש און פארבעסערן דעם מצב, אדער צי דאס וועט פשוט אפשלעפן די ארבעט פון פאררעכטן די שוואכקייטן אינעם עדיוקעישאן סיסטעם.

דערווייל ווערט די סוספענדירונג אנגערופן אלס א "צייטווייליגע" זאך, און מען ערווארט צו הערן פרישע באשלוסן איבער די צוקונפט פון די נאציאנאלע עקזאמען פראגראם אין די קומענדיגע צייט, בעת די עדיוקעישאן מיניסטעריום קוקט איבער אירע פאליסיס.