לאנג איילענד: א 29-יעריגער מאן ארעסטירט נאכן פרובירן אונטערצוצינדן א לאקאלע שול

א 29-יעריגער לאנג איילענד איינוואוינער איז ארעסטירט געווארן נאכן פרובירן אונטערצוצינדן די 'יאנג איזראעל' שול אין וועסט העמפסטעד, נאסאו קאונטי, אין די פריע פארטאגס שעה'ן פון דאנערשטאג, אקטאבער 22.

לויט די נאסאו קאונטי פאליציי און אינפארמאציע וואס איז ארויסגעגעבן געווארן דורך די שול'ס סעקיוריטי טיעם, האט דער פארדעכטיגטער, אידענטיפיצירט אלס אזאם קאן פון די לעיקוויו געגנט, זיך דערנענטערט צום שול אויף 630 העמפסטעד עוועניו ארום 1:00 ביינאכט.

די אטאריטעטן געבן איבער אז קאן האט קודם פרובירט זיך איינצוברעכן אינעם געביידע דורכ'ן האקן אויף די גלעזערנע אריינגאנג טירן מיט א בעט. בחסדי השם זענען די טירן געבליבן גאנץ און האבן אים צוריקגעהאלטן פון אריינקומען אינעווייניג. נאכ'ן זען אז ער קען נישט אריינגיין, האט דער פארדעכטיגטער אונטערגעצינדן א סיין אויפ'ן גראז אינדרויסן און פרובירט אנצוצינדן די דערנעבנדיגע ביימער און געוויקסן ארום די שול.

די פאליציי איז אלארמירט געווארן און האט אים שפעטער ארעסטירט אין פארבינדונג מיט דעם אינצידענט. די נאסאו קאונטי פאליציי דעפארטמענט האט געמאלדן אז קאן שטייט אויס עטליכע ערנסטע קלאגעס, אריינגערעכנט דריטע-גראד און פינפטע-גראד ארסאן (אונטערצינדונג), ווי אויך צוויי קלאגעס פון דריטע-גראד קרימינאלע שאדן.

דער בייזוויליגער פרואוו צו אטאקירן די שול האט ארויסגערופן גרויס זארג צווישן די מיטגלידער פון די אידישע קאמיוניטי אין וועסט העמפסטעד. די סעקיוריטי פערסאנאל פון די שול האבן ענג קאאפערירט מיט די אויספארשער און איבערגעגעבן די סעקיוריטי קאמערע ווידעאוס פאר די דעטעקטיווס. לאקאלע פאליטישע פירער האבן שארף פארדאמט דעם אינצידענט, בשעת די לאקאלע פאליציי האט פארשטארקט די פאטראלן און זיכערהייט ארום די קהילה.

דער אינצידענט ברענגט נאכאמאל ארויס די וויכטיגקייט פון האבן גוטע סעקיוריטי מיטלען ביי שולן און אנדערע אידישע מוסדות, ספעציעל אין די שפעטע ביינאכט שעה'ן ווען די געביידעס זענען ליידיג און עס איז נישטא קיין מענטשן אויפ'ן ארט.

(עס איז וויכטיג צו באטאנען אז לויט'ן געזעץ ווערט דער אנגעקלאגטער פאררעכנט אלס אומשולדיג ביז ווילאנג דאס געריכט באווייזט אנדערש).