נתניהו מיט א דרייסטע ציל: מדינת ישראל וועט ווערן די דריטע גרעסטע 'עי-איי' (AI) מאכט אין די וועלט ביז פינף יאר

פרעמיער מיניסטער בנימין נתניהו האט ארויסגעשטעלט א דרייסטע ציל, דערקלערנדיג אז אין די קומענדיגע פינף יאר וועט מדינת ישראל זיך פלאצירן אלס די דריטע גרעסטע 'עי-איי' (AI - ארטיפישעל אינטעלידזשענס) מאכט אין די וועלט, קומענדיג גלייך נאך אמעריקע און כינע. רעדנדיג מיט זיין געווענליכע זעלבסט-זיכערקייט, האט נתניהו אוועקגעמאכט די פארגלייכן צו אנדערע לענדער וואס יאגן זיך נאך דעם זעלבן טיטל, און האט קלארגעשטעלט אז טראץ וואס מדינת ישראל איז א קליין לענדל, פארמאגט זי וואס עס פעלט זיך אויס אריינצוברעכן אין די העכסטע רייען, צולייגנדיג אז מיט סייעתא דשמיא און זייער טעכנאלאגישע קראפט וועלן זיי עס באווייזן.

די דערקלערונג קומט אין די צייט וואס די קאבינעט האט נארוואס באשטעטיגט דעם פארגאנגענעם יוני א נייע נאציאנאלע 'עי-איי' סטראטעגישע פלאן. דער פלאן שטעלט ארויס ריזיגע צילן, אריינגערעכנט צו ברענגען 100,000 'עי-איי' עקסעלערעיטארס, אויפשטעלן א ספעציעלע נאציאנאלע 'עי-איי' אינסטיטוט, מאכן מאסיווע אינוועסטמענטס אין 'קוואנטום קאמפיוטינג', און איינפירן וואס די באאמטע רופן "געלעבטע עי-איי" - וואס מיינט אריינצוברענגען ארטיפישעל אינטעלידזשענס אין די טעגליכע גאווערנמענט סערוויסעס און אין די אלגעמיינע עקאנאמיע.

נתניהו בויט זיין פלאן אויף א פארמולע וואס האט שוין געארבעט אין דער פארגאנגענהייט, אנווייזנדיג אויף די שנעלע וואוקס פון מדינת ישראל אלס א גלאבאלע מאכט אין די 'סייבער-סעקיוריטי' פעלד, אלס א באווייז אז דער זעלבער מהלך קען ארבעטן פאר ארטיפישעל אינטעלידזשענס. די לאנד'ס גרויסע צאל טעכנאלאגישע טאלאנטן, די בליענדע 'סטארטאפ' אינדוסטריע, און די שפיאנאזש אינפראסטרוקטור גיבן טאקע א שטארקע באזע פאר דעם חלום. אבער, פארוואנדלען די דרייסטע רייד אין רעזולטאטן וועט פאדערן ריזיגע און כסדר'דיגע אינוועסטמענטס אין קאמפיוטער אינפראסטרוקטור און א שנעלע פארמערונג פון פראפעסיאנאלע ארבעטער.

עס בלייבט אבער אן אפענע פראגע צי א לאנד פון אונטער צען מיליאן מענטשן קען טאקע איבערקומען די אומגעהויערע רעסורסן פון וואשינגטאן און בעידזשינג, א זאך וואס וועט זיך ארויסשטעלן אין די קומענדיגע פינף יאר וואס נתניהו האט איצט אראפגעשטעלט אלס זיין ציל.