בס"ד

היסטארישע ספעיס מיסיע: יאפאן גרייט זיך ארויסצושיסן א מאכטפולע ראקעט צום פלאנעט מאדים

יאפאן'ס געיעג צו גרייכן די מאדנע לבנה פונעם פלאנעט מאדים (מארס) האלט שוין ביי די לעצטע פאזעס, ווען די מאכטפולע "H3" ראקעט זיצט שוין אויפ'ן לאנטש-פעד און עס זענען פארבליבן בלויז געציילטע שעה צום גרויסן מאמענט.


די יאפאנעזע ספעיס אגענטור 'דזשאקסא' (JAXA) האט געמאלדן אז די ראקעט, וועלכע טראגט די MMX ספעיס-שיף, האט געענדיגט איר וועג ארויס צום לאנטש-פעד נומער 2 אינעם טאנעגאשימא ספעיס צענטער. עס איז ערווארטעט זיך צו הייבן דעם קומענדיגן אקטאבער 20, 2026, ארום 4:41 פארטאגס (לאקאלע צייט).


לופט-ווידעאס צייגן ווי די 63-מעטער ריזיגע ראקעט ווערט געשלעפט פאמעליך צו איר ארט. דאס איז די שטארקסטע ווערסיע פון די H3 ראקעט, באוואפנט מיט פיר מאכטפולע בוסטערס אין די זייטן, וואס פעלט זיך אויס צו קענען ארויסשלעפן די 4,500-קילאגראם ספעיס-שיף פון די ערד'ס גראוויטאציע און אנהייבן דעם לאנגן רייזע קיין מאדים. די מיסיע איז אריגינעל געווען געפלאנט פאר 2024, אבער מען האט געמוזט ווארטן אויף די קומענדיגע געלעגנהייט וואס מאכט זיך נאר איין מאל אין 26 מאנאטן.


די MMX פראיעקט איז אן אמביציעזע מיסיע מיטן ציל צו ברענגען סעמפלס פון 'פאבאס', די קליינע לבנה וואס קרייזט ארום מאדים. לויטן פלאן וועט די ספעיס-שיף אנקומען קיין מאדים אין יאר 2027, אראפלאזן א קליינע ראווער (געבויט דורך פראנצויזישע און דייטשע שותפים), און אויפשעפן כאטש 10 גראם פון די ארטיגע ערד. דערנאך וועט עס זיך ארויסלאזן אויפן וועג אהיים אין 2030, און אנקומען צוריק אויף אונזער וועלט אין 2031.


דער פראיעקט ווערט געפירט דורך די יאפאנעזע ספעיס אגענטור, מיט די הילף פון אמעריקע'ס 'נאסא' (NASA) און אנדערע ספעיס אגענטורן פון פראנקרייך, דייטשלאנד און אייראפע. דאס וועט זיין די ערשטע מאל אין די היסטאריע וואס מ'ברענגט צוריק א סעמפל פונעם מאדים סיסטעם. סייענטיסטן האפן אז די סעמפלס וועלן ענטפערן אויף די פראגע צי די לבנות פון מאדים זענען אריינגעכאפטע אסטערוידן אדער איבערבלייבענישן פון א מעכטיגע צוזאמענשטויס.


דער לאנטש איז אבער נאר דער ערשטער פון עטליכע ריזיקאלישע פאזעס. ווי ביי יעדע ראקעט, קען די צייט-פלאן זיך נאך טוישן אין די לעצטע מינוט צוליב די וועטער אדער טעכנישע פראבלעמען, און די גאנצע וועלט וועט מיטהאלטן מיט שפאנונג צו זען די רעזולטאטן.