וויירעל ווידעא וואס צייגט גלאנצנדע נאכט-הימל אויף 'מארס' איז א פאלשע פאבריקאציע


א ספעקטאקולערע ווידעא וואס פארשפרייט זיך לעצטנס אויפן אינטערנעט, פרעטענדירט צו צייגן דעם נאכט-הימל אויפן פלאנעט 'מארס', ווי געכאפט דורך די 'נאסא' ראווער 'קיוריאסיטי'. די ווידעא צייגט א געדיכטע צאל קאלירפולע שטערנס און גלאנצנדע נעבולאס, מיט די ראווער זיצנדיג דראמאטיש אויפן מארס אייבערפלאך. כאטש די בילדער זענען גאר אימפרעסיוו, שטימט עס אבער נישט מיט די אפיציעלע בילדער וואס נאסא האט ארויסגעגעבן. נאסא האט טאקע שוין געכאפט עכטע בילדער פון מארס ביינאכט, אבער די וויירעל 60-סעקונדע ווידעא איז ווייט פון אן אמת'ע רעקארדירונג.


אין פאקט, האט די 'קיוריאסיטי' ראווער שוין עטליכע מאל פאטאגראפירט דעם מארס הימל נאכן זונאונטערגאנג, אריינגערעכנט מערקווירדיגע בילדער וואו מען זעט די פלאנעטן 'ערד' און 'ווענוס' אלס קליינע ליכטיגע פינטלעך אינעם טונקעלן הימל. נאסא ערקלערט אז דער שטויב אין די אטמאספערע פון מארס האט א שטארקע ווירקונג אויף ווי אזוי דער הימל זעט אויס. די קאמערעס אויפן ראווער זענען סייענטיפישע אינסטרומענטן געמאכט צו דאקומענטירן די סביבה, און נישט צו פראדוצירן האליוואוד-סטייל פילמען. אין אן עכטע בילד וואס נאסא האט ארויסגעגעבן, זעט מען די פלאנעטן בלויז ווי קליינע פינטלעך, און נישט ווי די ריזיגע, קאלירפולע סצענעס וואס ווערן געוויזן אין די פאלשע ווידעא.


די ראווער האט אויך געכאפט עכטע, הערליכע וואלקענעס ביי פארנאכט, אריינגערעכנט קאלירפולע וואלקענעס וואס שיינען נאכן זונאונטערגאנג. נאסא האט באריכטעט אז אין יאר 2025 האט 'קיוריאסיטי' רעקארדירט א 16-מינוטיגע סעקווענץ פון די וואלקענעס, וואס צייגט רויטע און גרינע פארמאציעס פון קארבאן-דייאקסייד אייז הויך אין די מארס אטמאספערע. די דאזיגע אמת'ע בילדער באווייזן טאקע אז מארס קען פראדוצירן אויסטערלישע הימלען, אבער זיי זענען פונדאמענטאל אנדערש פון א פראפעסיאנאל-געמאכטע ווידעא וואס צייגט א פולע הימל מיט שטערנס און קאלירן.


דער חילוק איז גאר וויכטיג, וויבאלד וויירעל בילדער פון ספעיס קענען גרינג צומישן דעם עולם צווישן עכטע סייענטיפישע פאטאגראפיע און פאלשע, קאמפיוטער-געמאכטע קונסט. נאסא'ס אייגענע בילדער צייגן אז די עכטע נאכט-הימל אויף מארס קען טאקע אנטהאלטן שטערנס און אנדערע הימלישע קערפערס, אבער די אפיציעלע דאקומענטירטע בילדער פונעם ראווער שטיצן בשום אופן נישט די פאלשע ווידעא. די וויירעל ווידעא קען אפשר אויסזען ווי אן אטעם-פארכאפנדע פענסטער צו אן אנדערע פלאנעט, אבער דער אמת איז אז די צושויער זען נישט דעם פלאנעט מארס, נאר אן אימפרעסיווע דיגיטאלע פאבריקאציע וואס איז דיזיינט געווארן אויסצוזען ווי מארס.