איראן שטעלט פאר א נייע אונטערערדישע "מיסיל שטאט"; סטראשעט מיט אטאקעס "אויסער דעם מיטל מזרח"

איראן'ס רעוואלוציאנערע גווארדיע האט געמאלדן אז זיי האבן אויפגעדעקט א נייע אונטערערדישע "מיסיל שטאט", און האבן ארויסגעגעבן בילדער און ווידעא קליפס וואס צייגט ווי דער הויפט פון די באוואפנטע קרעפטן, מעידזשאר גענעראל עלי אבדולאחי, און דער קאמאנדיר פון די עראָוספעיס קרעפטן, בריגאדיר גענעראל סעיד מאדזשיד מוסאווי, מאכן א טור אינעם קאמפלעקס.

די בילדער זענען פארעפנטליכט געווארן דורך די איראנער 'טאסנים' נייעס אגענטור, וואס איז אפיליאירט מיט די רעוואלוציאנערע גווארדיע, און אין איינע פון די בילדער זעט מען די צוויי קאמאנדירן שטיין נעבן א מאסיווע מיסיל לאנטשער. די איראנער באאמטע האבן נישט ארויסגעגעבן קיין דעטאלן וואו די פאסילעטי געפינט זיך, אדער ווען דער באזוך איז פארגעקומען.

דורכאויס דעם טור האט אבדולאחי געווארנט מיט א שארפן טאן, אז אויב איראן וועט נאכאמאל ווערן אטאקירט, וועט זייער רעאקציע זיין פיל ברייטער און וועט זיך אריבערכאפן "אויסער די גרעניצן פונעם מיטל מזרח".

די יעצטיגע אנטפלעקונג קומט בלויז עטליכע טעג נאכדעם וואס א ווארטזאגער פאר די רעוואלוציאנערע גווארדיע האט געמאלדן אז די מיליטער האט אריבערגעפירט אירע פראדוקציע ליניעס פאר מיסילס און דראונס פון די אויבערפלאך צו אונטערערדישע לאקאציעס, כדי די ארבעט זאל קענען אנגיין אומגעשטערט אפילו אונטער שווערע באמבארדירונגען.

עס איז באקאנט אז איראן האט שוין אין די פארגאנגענהייט געוויזן ענליכע "מיסיל שטעט", און די יעצטיגע שריט איז א קלארע מעסעדזש געצילט קעגן אירע שונאים, ספעציעל אמעריקע און מדינת ישראל, נאך די לעצטיגע מלחמה.

וויבאלד די בילדער און באהויפטונגען קומען דירעקט פון די איראנער רעגירונג-קאנטראלירטע מידיא, איז נישט דא קיין שום אומאפהענגיגע באשטעטיגונג איבער וואס פונקטליך די פאסילעטי פארמאגט אדער וויאזוי עס ארבעט. דאס לאזט איבער עטליכע גרויסע פראגעס אומפארענטפערט, אריינגערעכנט וויפיל אזעלכע אונטערערדישע באזעס עקזיסטירן באמת, וואס זייערע עכטע מעגליכקייטן זענען, און וויאזוי וואשינגטאן און תל אביב וועלן רעאגירן צו די נייע אנטוויקלונגען.