קיין אויסלענדישע האנט: קלעיטאן מאכט אוועק די טענות אז א קאארדינירטע סייבער אטאקע איז געשטאנען אונטער די סיסטעם אויספאלן אין אמעריקע
אמעריקאנער שפיאנאזש דירעקטאר: די לעצטיגע טעכנאלאגישע קראכן זענען נישט קיין סייבער אטאקעס
דער דירעקטאר פון נאציאנאלע שפיאנאזש, דזשעי קלעיטאן, האט אפגעווארפן די זארגן אז די רייע טעכנאלאגישע קראכן וואס האבן לעצטנס פאסירט איבער די פאראייניגטע שטאטן זענען פארבינדן צו א קאארדינירטע סייבער אטאקע אדער אן אפעראציע פון א פרעמדע רעגירונג.
"מיר זעען נישט קיין שום צייכנס פון א קאארדינירטע סייבער אטאקע - לאמיר דאס קלארשטעלן - און מיר זעען נישט קיין שום באווייזן פון סטעיט-געשטיצטע אקטיוויטעטן דא," האט קלעיטאן געזאגט, אונטערשטרייכנדיג אז שפיאנאזש באאמטע האבן גאר שטארק נאכגעפארשט די אינצידענטן.
די טעכנאלאגישע פראבלעמען האבן באטראפן עטליכע סעקטארס, אריינגערעכנט לופט רייזעס, בענק, גרויסע טעכנאלאגיע פירמעס און רעגירונג סיסטעמען, וואס דאס האט געצויגן אויפמערקזאמקייט צו די שוואכקייטן פון די קריטישע דיגיטאלע אינפראסטרוקטור. קלעיטאן האט ערקלערט אז אסאך ארגאניזאציעס האבן לעצטנס אידענטיפיצירט זיכערהייט שוואכקייטן אין זייערע אלטע סיסטעמען און האבן אינסטאלירט 'פעטשעס' און אפגרעידס דאס צו פאררעכטן. אבער, טייל סיסטעמען האבן פשוט נישט געקענט געהעריג צוריק אנצינדן אדער קאמוניקירן מיט די פארבינדענע נעטווארקס נאכדעם וואס די טוישונגען זענען אריינגעלייגט געווארן.
ער האט אויך אנגעוויזן אז א קורצע איבעררייס ביי אן אינערליכע קאמוניקאציע נעטווארק פון די 'ען-עס-עי' (NSA) איז אויך געקומען צוליב א זיכערהייט אפגרעיד נאכן טרעפן א ווייכווארג (software) פראבלעם.
די לעצטיגע אינצידענטן רעכענען אריין א נאציאנאלע 'גראונד סטאפ' דורך די 'עף-עי-עי' (FAA) וואס האט אפגעשטעלט אלע פליגערס, קראכן ביי מייקראסאפט סערוויסעס און גרויסע בענק, און באריכטעטע פראבלעמען ביי אינערליכע רעגירונג נעטווארקס. פעדעראלע באאמטע האבן אונטערגעשטראכן אז די אלע אינצידענטן האבן באזונדערע טעכנישע ערקלערונגען און זענען נישט קיין רעזולטאט פון איין בייזוויליגע אטאקע. דער סעקרעטערי אוו סטעיט, מארקא רוביא, האט אויך געזאגט אז עס איז נישטא קיין שום באווייזן וואס זאל פארבינדן די קראכן צו פרעמדע לענדער אדער סייבער-קרימינאלן.
קלעיטאן האט צוגעגעבן אז די טיימינג און די פארנעם פון די קראכן האבן טאקע געצויגן פארדאכטן, אבער ער איז געבליבן ביי זיינס אז די שפיאנאזש אינפארמאציע צייגט נישט אויף קיין קאארדינירטע אפעראציע קעגן אמעריקע. די ערקלערונגען האבן אבער נישט אינגאנצן פארענטפערט די פראגעס פארוואס אזוי פיל גרויסע סיסטעמען האבן געקראכט אין אזא קורצע צייט אפשניט. די אינצידענטן האבן פריש אויפגעוועקט די קריטיק איבער די אלטע טעכנאלאגיע און די טשעלענדזשעס וואס אגענטורן און פריוואטע קאמפאניס גייען אדורך ווען זיי דארפן אפגרעידן קריטישע אינפראסטרוקטור.
באאמטע זאגן אז עס איז נאך אלץ וויכטיג צו אינסטאלירן די נויטיגע 'פעטשעס' פאר באקאנטע פראבלעמען, אפילו אויב עס קען צייטווייליג שטערן די סערוויסעס, בעת וואס די אויספארשונגען און טעכנישע איבערזיכטן גייען ווייטער אן.