פרעזידענט טראמפ רייסט אראפ נעטא און אליאירטע לענדער פארן זיך ארויסדרייען פון העלפן קעגן איראן


פרעזידענט טראמפ האט נאכאמאל שארף קריטיקירט אמעריקע'ס אינטערנאציאנאלע אליאירטע, דערציילנדיג ווי אזוי די פאראייניגטע שטאטן האט באקומען קנאפע אדער גארנישט קיין שטיצע פון נעטא און אנדערע לענדער ווען עס איז געקומען צום יעצטיגן קאנפליקט מיט איראן. טראמפ האט איבערגעחזר'ט עטליכע מאל ווי ער האט געפרעגט די לענדער צי זיי ווילן זיך אנטיילנעמען אין די אפעראציעס, אבער ער האט באקומען א העפליכע אפזאג פון יעדן איינעם. אין איין פאל האט טראמפ נאכגעזאגט ווי ער האט זיי געפרעגט: "העי, אויב עטס ווילטס העלפן, פיין," און די טרוקענע ענטפער איז געווען: "נישטא קיין רעדע, מיר גייען נישט העלפן." דער פרעזידענט האט ארויסגעברענגט אז דאס איז א טייל פון א ברייטערע פראבלעם, וואו אמעריקע טראגט דעם גאנצן פינאנציעלן און מיליטערישן לאסט צו באשיצן אירע אליאירטע, אבער באקומט זערא שטיצע צוריק ווען זי דארף עס באמת.


טראמפ האט אנגעוויזן אויף די ריזיגע סומעס געלט וואס אמעריקע ספענדט צו פארטיידיגן נעטא מיטגלידער און אנדערע לענדער ווי סאוט קארעא, אלס א באווייז אז די רילעישאנשיפ איז אינגאנצן אומבאלאנסירט. אין א פאוסט אויף 'טרוט סאשעל' פריער דעם יאר, האט ער געשריבן אז רוב נעטא לענדער האבן קלארגעמאכט אז זיי ווילן נישט ווערן אריינגעצויגן אין קיין מיליטערישע אפעראציעס קעגן איראן, טראץ וואס זיי זענען אלע איינשטימיג אז מען טאר קיינמאל נישט לאזן טעהראן אנקומען צו נוקלעארע וואפן. ער האט אראפגעריסן נעטא אלס א "וואן וועי סטריט" (איין-וועג גאס), טענה'נדיג אז אמעריקע באשיצט זיי אבער באקומט גארנישט צוריק אין א צייט פון נויט. דער פרעזידענט האט אויך אריינגעווארפן אין די זעלבע קאטעגאריע יאפאן און אויסטראליע, צוויי לאנגיעריגע אמעריקאנער שותפים, וואס האבן זיך אויך ארויסגעדרייט פון ארויסהעלפן קעגן איראן.


טראץ די אנגעצויגנקייט, האט טראמפ קלארגעשטעלט אז אמעריקע האט למעשה קיינמאל נישט געדארפט קיין פרעמדע הילף דורכצופירן אירע מיליטערישע צילן, אנווייזנדיג אויף די גרויסע סוקסעסן קעגן איראן'ס מיליטערישע אינפראסטרוקטור. ער האט געזאגט אז איראן'ס נעיווי, לופט-פלאט און די העכסטע פירערשאפט זענען פאקטיש צעשמעטערט געווארן דורך אמעריקאנער אטאקעס, און דאס וואס די אליאירטע האבן נישט געהאלפן האט בכלל נישט אויסגעמאכט צום ענדגילטיגן רעזולטאט. אין די זעלבע צייט האט טראמפ שטארק געלויבט עטליכע מיטל-מזרח לענדער, אריינגערעכנט קאטאר, די פאראייניגטע אראבישע עמיראטן (UAE), סאודי אראביע, באכריין און קואוועיט, פאר זייער שטארקע און כסדר'דיגע שטיצע דורכאויס דעם קאנפליקט.


די רייבונגען צווישן טראמפ און נעטא האבן ווייטער אנגעהאלטן אין די לעצטע מאנאטן, און עס האט זיך שטארק ארויסגעוויזן ביי אן אנגעצויגענעם נעטא סאמיט אין אנקארא דורכאויס דעם זומער. דארט האט טראמפ געשיקט געמישטע מעסידזשעס, ווען פון איין זייט האט ער געלויבט די "געוואלדיגע פאראייניגונג" צווישן די מיטגלידער, אבער פון די אנדערע זייט האט ער פריש קריטיקירט זייער אפזאג זיך צו באטייליגן מיליטעריש. ער האט שפעטער אנגעוויזן אז זיין בעטן הילף פון די אליאירטע איז טיילווייז געווען א "לאיאליטעט טעסט", וואס האט קלאר ארויסגעוויזן וועלכע שותפים זענען גרייט צו שטיין מיט אמעריקע ווען די מצב ווערט שווער. צי די יעצטיגע קריזיס וועט טוישן די פנים פון די אליאנץ אויף ווייטער בלייבט צו זען, אבער טראמפ'ס ווערטער מאכן קלאר אז די עפיזאד האט איבערגעלאזט א בלייבנדע רושם אויף ווי אזוי ער קוקט אן אמעריקע'ס טראדיציאנאלע שותפים.