בס"ד

נאך 286 טעג אויפ'ן וואסער: די 'אברהם לינקאלן' עראפלאן טרעגער שיף מאכט איר וועג אהיים נאך א היסטארישע מיסיע

די אמעריקאנער נעיווי עראפלאן טרעגער שיף, די 'USS אברהם לינקאלן' (CVN-72), האט דעם 6'טן סעפטעמבער 2026 פארלאזט דעם לאעם טשאבאנג פארט אין טיילאנד, נאך א פינף-טאגיגע אפשטעל וואס האט געגעבן א זעלטענע געלעגנהייט פאר אירע ארום 5,000 מאנשאפט מיטגלידער זיך אפצורוען נאך איינע פון די לענגסטע כסדר'דיגע מיסיעס אין די לעצטערע היסטאריע פון די אמעריקאנער נעיווי.

ווידעא קליפס פונעם ברעג ווייזן ווי די ריזיגע שיף, אנגעפילט מיט עראפלאנען אויפ'ן דעק, רוקט זיך לאנגזאם ארויס פונעם פארט צוריק צום אפענעם ים. די שיף איז אנגעקומען קיין טיילאנד דעם 2'טן סעפטעמבער פאר איר ערשטע געהעריגע אפשטעל זינט זי האט פארלאזט סאן דיעגא אין נאוועמבער 2025. ביז די טיילאנד באזוך, איז די שיף געווען אויפ'ן וואסער פאר א רעקארד פון 286 נאכאנאנדיגע טעג, אריינגערעכנט א לאנגע תקופה פון קאמף אפעראציעס אינעם מיטל מזרח אונטער די אמעריקאנער סענטראל קאמאנד (סענטקאם).

דער באזוך קומט נאך חדשים פון באריכטעטע שוועריגקייטן אויפ'ן שיף, ווען פאמיליעס פון די זעלנער און אנדערע האבן אויסגעדרוקט זארג איבער די לאנגע צייט אויפ'ן וואסער, סופליי אישוס, און א געפאלענע מאראל ביי די מאנשאפט אין די שפעטערע פאזעס פון די מיסיע. ריער אדמיראל ראבערט לאקראן, קאמאנדיר פון די 'קעריער סטרייק גרופ 3', האט אנגערופן דעם אפשטעל "א פארדינטע געלעגנהייט" פאר די סעילארס און מארינען זיך אפצורוען און אנפילן די באטעריעס, אינדערצייט וואס ער האט ארויסגעברענגט די היסטארישע דערגרייכונגען פון די גרופע דורכאויס זייער צייט אינעם מיטל מזרח.

אינאיינעם מיט די לינקאלן, האבן אנדערע באגלייטנדע שיפן, אריינגערעכנט די 'USS פרענק פיטערסאן דזשוניער' און די 'USS ראבערט סמאלס', אויך געמאכט זייערע אייגענע אפשטעלן אין דערנעבנדיגע פארטן אין טיילאנד.

אויסער דעם וואס עס האט געגעבן א טשענס פאר די מאנשאפט זיך אפצורוען, האט דער באזוך אויך געהאט א קלארע דיפלאמאטישע ציל. אמעריקאנער באאמטע האבן עס אראפגעשטעלט אלס א צייכן פון די לאנג-יעריגע אליאנץ צווישן אמעריקע און טיילאנד. קעפטן דען קילער, דער הויפט קאמאנדיר פון די לינקאלן, האט געזאגט אז דער באזוך וועט העלפן "פארשטיין איינער דעם אנדערן בעסער" און פארשטארקן די געמיינזאמע היסכמות פאר לאקאלע זיכערהייט. טויזנטער סעילארס און מארינען זענען געפירט געווארן מיט באסעס צום דערנעבנדיגן שטאט פאטאיא, וואס האט געגעבן א שטארקע עקאנאמישע שטופ פאר די ארטיגע געשעפטן, בשעת לאקאלע טיילאנדער אויטאריטעטן האבן קאארדינירט מיט די ארטיגע נעיווי צו פארזיכערן אז אלס פארט אדורך רואיג.

יעצט, נאכ'ן ענדיגן דעם אפשטעל, האט די אברהם לינקאלן סטרייק גרופע ווייטער פארגעזעצט איר רייזע דורכ'ן סאוט טשיינע סי, אויפ'ן לאנגן וועג צוריק צו איר היים-באזע אין סאן דיעגא. די שיף איז לעצטנס איבערגענומען געווארן אינעם מיטל מזרח דורך די 'USS דזשארדזש וואשינגטאן', וואס ברענגט צו אן ענדע איינע פון די שווערסטע און לענגסטע מיסיעס פאר אן אמעריקאנער עראפלאן טרעגער שיף אין די לעצטערע יארן. כאטש עס איז נאך נישט דא קיין פונקטליכע דאטום ווען די שיף וועט אנקומען קיין קאליפארניע, איז די אפפאר פון טיילאנד א גרויסע שריט פאראויס צו ברענגען די טויזנטער זעלנער אהיים נאך כמעט א גאנצע יאר אוועק פון דער היים.