בס"ד

מדינת ישראל קרעפטן האבן עלימינירט דעם טעראריסט וואס האט פארכאפט נועה ארגמני אויף א מאטארציקל אום שמחת תורה

די מדינת ישראל זיכערהייט קרעפטן האבן פארעפנטליכט א דראון ווידעא ווי מען זעט די לופט-אטאקע וואס האט אומגעברענגט דעם טעראריסט סאהער נידאל לאטפי סאקער. סאקער איז דער טעראריסט וואס מ'האט געזען אויף די באקאנטע ווידעא דרייוון דעם מאטארציקל וואס האט פארכאפט נועה ארגמני און אבינתן אור פונעם נאווע מוזיק פעסטיוואל אינעם ביטערן שמחת תורה טאג אין יאר 2023.

די געמיינזאמע אפעראציע פון די מיליטער, שב"כ און פאליציי איז פארגעקומען שבת אין די נוסיריאט געגנט אין צענטראל עזה. באאמטע האבן באשטעטיגט זיין טויט זונטאג, נאכדעם וואס פאלעסטינער קוועלעס האבן שוין פריער באריכטעט איבער די אטאקע.

לויט די מדינת ישראל אויטאריטעטן, איז סאקער געווען פארבינדן מיט גלאבאלע דזשיהאד ארגאניזאציעס וואס זענען אקטיוו אין עזה, און האט פארזארגט כאמאס מיט געווער דורכאויס די מלחמה. אין די לעצטע צייט האט ער געארבעט אינאיינעם מיט כאמאס און איסלאמישע דזשיהאד טעראריסטן צו פלאנירן פרישע אטאקעס קעגן סאלדאטן און ציווילע. די מיליטער האט גענוצט פרעציזע וואפנס און לופט-אויפזוכונג צו פארמיידן פאטאליטעטן ביי אומשולדיגע ציווילע אין די אומגעגנט, כאטש פאלעסטינער קוועלעס געבן איבער אז כאטש איין אנדערע פערזאן איז פארוואונדעט געווארן.

די אטאקע שליסט א ווייטאגליכע קאפיטל וואס איז פארבינדן מיט איינע פון די מערסט באקאנטע בילדער פונעם שמחת תורה אטאקע, ווען די ווידעא ווי ארגמני ווערט אוועקגעפירט אויפן מאטארציקל איז געווארן א סימבאל פונעם כאאס און טעראר פון יענעם טאג. ווי באקאנט האט ארגמני איבערגעלעבט אכט חדשים אין כאמאס געפענגעניש ביז די ספעציעלע קרעפטן האבן איר באפרייט אין יוני 2024 ביי די העלדישע 'אפעראציע ארנון' אין נוסיריאט, וואו נאך דריי משכונות זענען באפרייט געווארן.

איר חתן, אבינתן אור, איז נישט געווען אזוי מזל'דיג אין די קורצע טערמין, און איז געבליבן א משכון פאר מער ווי צוויי יאר, ביז ער איז ענדליך באפרייט געווארן אין אקטאבער 2025 אלס טייל פון א משכונות אפמאך.

די עלימינאציע פון סאקער צייגט קלאר אז מדינת ישראל גייט נאך אלץ אן מיט די געיעג נאך די טעראריסטן וואס זענען געווען פארמישט אין די אטאקעס, אפילו יעצט יארן שפעטער ווען די ברייטערע מלחמה האט זיך שוין אפגעשטילט און עס הערשט א שוואכע פייער-אפשטעל.