טויטליכע רוסישע דראון אטאקע אינמיטן העלן טאג אויף א היסטארישע געביידע אין צענטער פון קיעוו


א רוסישע דראון האט מאנטאג, סעפטעמבער 28, אריינגעקראכט אין די 'נעשאנעל אקאדעמי אוו סייענסעס' געביידע אין הארץ פון די אוקראינישע הויפטשטאט קיעוו, איבערלאזנדיג דעם בנין אין פלאמען אינמיטן העלן טאג, לויט ווי אוקראינישע באאמטע געבן איבער.


די פרעסע אפטיילונג פון די אקאדעמיע האט געמאלדן אז די דראון האט דירעקט געטראפן דעם בנין וואס געפינט זיך אינעם שעווסענקיווסקי דיסטריקט אין די הויפטשטאט. בילדער פון די סצענע האבן געוויזן א שוידערליכע בילד ווי מענטשן קריכן ארויס אויף די פענסטערס זיך צו ראטעווען פון די ריזיגע פלאמען. די לאקאלע מיליטערישע אדמיניסטראציע אין קיעוו האט באשטעטיגט אז איין פרוי איז אומגעקומען און דריי אנדערע זענען פארוואונדעט געווארן, כאטש די ציפערן קענען זיך נאך טוישן וויבאלד די זוכונגען גייען נאך אן.


דער אוקראינישער פרעזידענט וולאדימיר זעלענסקי האט געזאגט אז א גרויסע רעטונג אפעראציע איז אין פולן שוואונג, וואו עמערדזשענסי קרעפטן ארבעטן צו פארלעשן דאס פייער און זוכן פאר מענטשן וואס זענען מעגליך פארכאפט אינעווייניג. אלע לאקאלע עמערדזשענסי אגענטורן זענען אראפגערופן געווארן צו די סצענע.


זעלענסקי האט אנגעוויזן אז די אקאדעמיע איז נישט געווען דער איינציגסטער ציווילער ציל וואס איז היינט געטראפן געווארן. ער האט באטאנט אז א פארמאסוטיקעל קאמפאני און געז סטאנציעס זענען אטאקירט געווארן אין קיעוו, א ביזנעס צענטער איז געטראפן געווארן אין דניפרא, און אנדערע ציווילע צילן, ביזנעסער און קאמוניקאציע אינפראסטרוקטור זענען אויך געצילט געווארן אין אנדערע שטעט און ראיאנען איבערן לאנד. לאקאלע מידיא באריכטעט אז פיר מענטשן זענען פארוואונדעט געווארן ביי די אטאקע אין דניפרא.


דער פרעזידענט האט אויסגעדריקט זיינע טיפסטע טרייסט וואונטשן פאר די פאמיליעס פון די אומגעקומענע, און האט געשוואוירן אז רוסלאנד וועט טראגן די קאנסעקווענצן דערפאר. ער האט אויך געפאדערט פון אוקראינע'ס אליאירטע לענדער צו פארשטיין אז שטיצן אוקראינע מיינט צו באשיצן מענטשליכע לעבנס, און אז טעראר טאר קיינמאל נישט ווערן א נארמאלע ערשיינונג אין קיין שום פלאץ, צולייגנדיג אז רוסלאנד מוז ווערן פאראנטווארטליך פאר אירע אקטן.


די אקאדעמיע, וואס איז געגרינדעט געווארן אין יאר 1918 און איז לכתחילה אנגעפירט געווארן דורכ'ן סייענטיסט וולאדימיר ווערנאדסקי, איז איינע פון די עלטסטע סייענטיפישע אינסטיטוציעס אינעם לאנד. די אלע דעטאלן קומען פון אוקראינישע באאמטע און מידיא קוועלער, וויבאלד קיין שום אפיציעלע רעאקציע פון רוסלאנד איז דערווייל נישט געהערט געווארן.