אומגלויבליכע סצענעס: ארעסטאנט באקומט דעם צונאמען "דער גומע-מענטש" נאכ'ן זיך דורכקוועטשן א שמאלע שפאלט און אנטלויפן פון פאליציי סעל


זיכערהייט קעמערעס האבן אויפגעכאפט א שאקירנדע און אומגלויבליכע אנטלויף-אקציע פון א פאליציי סעל אין פלאריאנאפאליס, בראזיל, וואס זעט אויס כמעט צו מאדנע צו גלייבן.


אין די פריע שטונדן פון סעפטעמבער 26, 2026, האט א מאן - וועלכער איז קוים עטליכע שטונדן פריער ארעסטירט געווארן אויף קלאגעס פון דאמעסטיק ווייאלענס - אנגעהויבן אריבערצוקוועטשן זיין קערפער דורך א גאר קליינע שפאלט צווישן די אייזערנע גראטעס פון די לאקאלע פאליציי סעל.


די ווידעא צייגט ווי דער ארעסטאנט שטיפט קודם אדורך זיינע הענט, דערנאך זיין קאפ, און מיט אן אומנאטורליכע בייגעוודיגקייט קוועטשט ער אדורך זיין גאנצן קערפער ביז ער געפינט זיך אינדרויסן פון די צעל. די עפענונג איז געווען בערך 45 ביי 15 צענטימעטער, וואס איז געשאפן געווארן צוליב וואס עס האבן געפעלט עטליכע האריזאנטאלע גראטעס. איינמאל ער איז געווען אינדרויסן, האט ער רואיגערהייט אנגעטון זיינע שיך און ארויסשפאצירט אן דעם וואס קיינער זאל באמערקן.


דער אינצידענט האט פארוואנדלט דעם פארדעכטיגטן אין א רעדעוודיגע טעמע איבערנאכט, און די לאקאלע מידיא האט אים שוין א נאמען געגעבן "דער עלאסטישער מענטש" (גומע-מענטש) צוליב זיינע קונצליכע באוועגונגען. די אנטלויף האט אויך אויפגעדעקט א שרעקליכע שוואכקייט אין די פאליציי סטאנציע, און האט אויפגעברענגט שווערע פראגעס וויאזוי אזא גרויסע לאך אין א פאליציי סעל איז געבליבן אומבאמערקט.


די פאליציי זאגט אז די סעל איז דערווייל פארמאכט געווארן און מען גייט עס איבערמאכן און פאררעכטן צו פארמיידן אזעלכע פעלער אין די צוקונפט. דערווייל קומט פאר א ברייטע זוכעניש אפצוגעפינען דעם אנטלאפענעם, און די אויטאריטעטן האבן פארלאנגט א פאראויסדיגע ארעסט באפעל קעגן אים. כאטש די קלאגעס קעגן אים דארפן נאך ווערן אויפגעוויזן אין געריכט, איז די הויפט פראגע יעצט אויפן טיש: וויאזוי האט ער געקענט אזוי גרינג פארשווינדן ווערן פון א פארשלאסענע פאליציי סעל?