פרעזידענט טראמפ אונטערשרייבט היסטארישן אפמאך מיט הויפט טעכנאלאגיע פירער איבער 'סופער אינטעלידזשענס'


ווייסן הויז. – פרעזידענט טראמפ האט דעם 29'סטן סעפטעמבער אויפגענומען די גרעסטע טעכנאלאגיע עקזעקיוטיוון אין ווייסן הויז פאר א גאר וויכטיגע מיטינג, וואס האט זיך געענדיגט מיט א פרייוויליגע "ווייסע הויז אפמאך אויף סופער אינטעלידזשענס" (Super Intelligence).


דער אפמאך איז אונטערגעשריבן געווארן דורך די פירער פון די גרעסטע טעק-ריזן, אריינגערעכנט מעטא, גוגל, אפען-עי-איי (OpenAI), אנטראפיק, ענווידיע און עקס-עי-איי (xAI), אינאיינעם מיטן פרעזידענט. נאכן פארמאכטע-טירן סעסיע, האט מען געזען ווי טראמפ שטייט אינאיינעם מיט מארק צוקערבערג און די אנדערע אינדוסטריע פירער.


מעטא סי-אי-או מארק צוקערבערג האט ארויסגעברענגט אז דער הויפט ציל פונעם אפמאך איז צו געבן פארן אמעריקאנער פאלק און די קאסטומערס די קאנפידענס אז די טעכנאלאגיע ארבעט פונקט ווי געפלאנט. ער האט עס אראפגעלייגט אלס א גוטע אנהייב וואס די גאנצע סעקטאר קען נאכטון. פרעזידענט טראמפ האט אנגערופן דעם דאקומענט "כמעט ווי א קאנסטיטוציע", און עס באצייכנט אלס א מאראלישע שוץ קעגן מעגליכע ריזיקעס.


דער אפמאך שטעלט אוועק פיר שיכטן פון זיכערהייט מיטלען צו באשיצן דעם פובליק: שטארקע אינערליכע קאנטראלס, ספעציעלע איבערזיכט טיעמס, אומאפהענגיגע אינדרויסנדיגע אודיטס, און בארד-לעוול קאמיטעס צו האלטן אן אויג אויף די נייע מאדעלן.


אין א באזונדערע שריט, האט דער פרעזידענט ארויסגעגעבן אן עקזעקיוטיוו ארדער וואס הייסט אלע פעדעראלע אגענטורן צו טוישן דעם באקאנטן טערמין "ארטיפישעל אינטעלידזשענס" (AI) צו "סופער אינטעלידזשענס" אדער "SI" אין אלע אפיציעלע קאמוניקאציעס.


דער אפמאך לייגט א שטארקן דגוש אויף דעם אז די אינדוסטריע זאל זיך אליינס רעגולירן (סעלף-רעגולאציע), אנשטאט ארויפצוצווינגען נייע שטרענגע רעגירונג געזעצן. די קאמפאניס האבן זיך אונטערגענומען אליינס אויפצוכאפן און פאררעכטן סיי וועלכע אומגעוואונטשענע פראבלעמען אין זייערע סיסטעמען. די אדמיניסטראציע האט ארויסגעברענגט אז דאס וועט האלטן א באלאנס צווישן אינאוואציע און פובליק טראסט, און וועט העלפן אמעריקע אנצוהאלטן איר פירערשאפט אין דעם פעלד אן די שלעפעריגע פראצעסן פון רעגירונג רעגולאציעס.


ביי די מיטינג האבן די באטייליגטע אויך ארומגערעדט איבערן פארמירן נאך איבערזיכט מעכאניזמען און ווי אזוי צו פארשנעלערן די לאקאלע אנטוויקלונג פון די טעכנאלאגיע דא אין לאנד. די שריט צייגט א קלארע ריכטונג פון די אדמיניסטראציע צו שטיצן שנעלע פארשריט דורך פרייוויליגע אינדוסטריע קאמיטמענטס.