טערקיי מאכט קלאר: מיר וועלן נישט אריינשיקן קיין טרופן קיין תימן אונטערן נייעם פארטיידיגונג אפמאך מיט סאודי אראביע


דער טערקישער אויסערן מיניסטער, כאקאן פידאן, האט קלארגעשטעלט אז טערקיי וועט נישט אריינשיקן קיין טרופן אין א צווייטע לאנד דורכצופירן אן אטאקע אונטער די נייע "מעקא געמיינזאמע פארטיידיגונג אפמאך", אונטערשטרייכנדיג אז דער אפמאך איז בלויז געמאכט געווארן פאר דעפענסיווע צוועקן.


רעדנדיג איבער די דריי-פאכיגע אליאנץ צווישן טערקיי, סאודי אראביע און פאקיסטאן, האט פידאן געזאגט אז אנקארא שטודירט יעצט אנדערע וועגן וויאזוי ארויסצוהעלפן סאודי אראביע זיך צו ספראווען מיט די כוטי אטאקעס, הויפטזעכטליך דורך צושטעלן 'עיר דעפענס' שטיצע.


דער אפמאך, וואס איז אונטערגעשריבן געווארן אין אוגוסט 2026, ארבעט ענליך צו א געמיינזאמע פארטיידיגונג פאקט וואס זאגט אז אן אטאקע אויף איין לאנד ווערט באטראכט ווי אן אטאקע אויף אלעמען. דער פאקט איז אקטיוויזירט געווארן דעם 5'טן אקטאבער אין ליכט פון די פארמערטע כוטי אטאקעס און זייערע טעריטאריאלע געווינסן אין תימן וואס האבן אנגעהויבן ערנסט סטראשען סאודישע צילן.


דער אויסערן מיניסטער האט ארויסגעברענגט אז כאטש טערקיי איז גרייט צו העלפן אן אליאירטע לאנד וואס ווערט אטאקירט, וועלן זיי אבער נישט ארויסשיקן קיין מיליטערישע קרעפטן פאר אפענסיווע אפעראציעס אויף פרעמדע באדן. אנשטאט דעם, האבן באאמטע דיסקוסירט איבער טעכנישע און דעפענסיווע הילף, אריינגערעכנט עיר דעפענס סיסטעמען, צו פארשטארקן די סאודישע מיליטערישע מעגליכקייטן.


פידאן'ס ווערטער קומען נאך עטליכע פרישע מיטינגען פון די סטראטעגישע קאמיטע פונעם אליאנץ אין ריאד, וואס האבן זיך קאנצענטרירט אויף שנעלע דעפענסיווע שטיצע. טערקישע מיליטערישע און טעכנישע טיעמס שאצן יעצט אפ די ספעציפישע געברויכן ווי עיר דעפענס, עלעקטראנישע מלחמה-געצייג און ענליכע שטיצע צו באשיצן סאודישע אינפראסטרוקטור און שטעט. די קלארשטעלונג קומט אין א צייט וואס דער אפמאך רוקט זיך פאראויס צו ווערן באשטעטיגט אין די טערקישע פארלאמענט.


די שטעלונג שפיגלט אפ אנקארא'ס ציל צו העלפן בלויז אינערהאלב די סאודישע גרעניצן און זיך ארויסדרייען פון א דירעקטע קאמף ראלע קעגן די כוטיס אין תימן. סיי די סאודישע און סיי די פאקיסטאנער פירער זענען פארמישט אין די זעלבע געשפרעכן צו באשליסן די פראקטישע דעטאלן פון די געמיינזאמע הילף. מיט זיינע ווערטער האט פידאן אוועקגעשטעלט א קלארע גרעניץ ווי ווייט דער אליאנץ גייט, בעת די אנגעצויגנקייט אין די ראיאן האלט אן, פרובירנדיג צו בארואיגן די געמיטער אינדערהיים אין טערקיי בשעת'ן מקיים זיין זייערע פארפליכטונגען אונטערן נייעם פאקט.