זעלענסקי: אוקריינע איז גרייט אפצוהאלטן וואלן אויב רוסלאנד גייט איין אויף א 60-טאגיגע פייער-אפשטעל


דער אוקריינישער פרעזידענט וולאדימיר זעלענסקי זאגט אז אוקריינע איז גרייט אפצוהאלטן פרעזידענטליכע וואלן, בתנאי אז רוסלאנד גייט איין אויף א פולשטענדיגע פייער-אפשטעל פאר א צייט-אפשניט פון 60 טעג. אין אן אינטערוויו מיט די עי-בי-סי נייעס אגענטור האט זעלענסקי געזאגט: "גיבט אונז צוויי חדשים, 60 טעג פון א טאטאלע פייער-אפשטעל, און מיר וועלן ארגאניזירן וואלן."


דער שריט קומט אלס א דירעקטע ענטפער צו פרעזידענט טראמפ'ס כסדר'דיגע קריטיק אז אוקריינע נויטיגט זיך אין א נייע פירערשאפט, און עס לייגט יעצט דעם פרעשור אויף מאסקווע אנשטאט אויף קיעוו. דער פארשלאג רעכנט אויך אריין א געגנזייטיגע אפמאך אפצושטעלן אטאקעס אויף ענערגיע אינפראסטרוקטור, אין ליכט פון די אנגעצויגנקייט ארום די אוקריינישע אטאקעס אויף רוסישע אויל רעפיינעריס און די פרישע אמעריקאנער אפמאך מיט רוסלאנד איבער דיזל סופלייען.


ווי באקאנט זענען די אוקריינישע פרעזידענטליכע וואלן אפגעלייגט געווארן צוליב די 'מארשעל לא' (מיליטערישע געזעץ) וואס איז אין קראפט זינט די רוסישע אינוואזיע אין יאר 2022, אונטער וועלכע זעלענסקי'ס טערמין איז אטאמאטיש פארלענגערט געווארן.


זעלענסקי האט שוין אין דער פארגאנגענהייט ארויסגעשטעלט דעם 60-טאגיגן תנאי, טענה'נדיג אז צו ארגאניזירן א זיכערע און יושר'דיגע אפשטימונג - מיט בעלאטס, אבזערווירער און געהעריגע סעקיוריטי פאר די וויילער - קען פשוט נישט דורכגעפירט ווערן אין בלויז עטליכע טעג אדער וואכן. פאריגן פעברואר האט ער אנטפלעקט אז רוסלאנד האט בלויז אנגעטראגן אן איין-טאגיגע פייער-אפשטעל פאר די וואלן, עפעס וואס ער האט אנגערופן אלס אבסורד.


מאסקווע, וועלכע רופט די אוקריינישע רעגירונג אומלעגאל און שטיפט כסדר אז מ'זאל אפהאלטן וואלן, האט דערווייל נישט פובליק רעאגירט צו דעם נייעם פארשלאג, און עס בלייבט אן אפענע פראגע צי אזא סארט פייער-אפשטעל קען בכלל אמאל צושטאנד קומען.