בס"ד

כאאס און געוואלדטאטן אין אלבאניע: מאסן פראטעסטן סטראשען צו ווארפן די רעגירונג


די הויפטשטאט פון אלבאניע געפינט זיך אין א טיפע כאאס נאך עטליכע טעג פון געוואלדיגע פראטעסטן. וואס האט זיך אנגעהויבן אלס א פרידליכע ראלי דורך סטודענטן, האט זיך שנעל פארוואנדלט אין א פולשטענדיגע אויפשטאנד קעגן דעם פרעמיער מיניסטער, עדי ראמא.


די אומרוען האבן זיך אנגעהויבן דעם 13'טן אקטאבער אינדרויסן פון די עדיוקעישאן מיניסטעריום אין טיראנא, און ביז דעם וויקענד האבן די מאסן אנגעהויבן ווארפן שטיינער, פייערוואקס און פייער-באמבעס אויף די פאליציי נעבן דעם פרעמיער מיניסטער'ס אפיס. די פראטעסטירער האבן אטאקירט רעגירונג געביידעס און פאליציי סטאנציעס, אונטערגעצינדן א טייל פונעם סופרים קאורט, פארברענט א פאליציי סטאנציע און אונטערגעצינדן דעם אריינגאנג פונעם אינטעריאר מיניסטעריום. לאקאלע מידיא האט אפילו באריכטעט אז א פאליציאנט'ס פוס האט זיך אנגעצינדן אין פייער דורכאויס די כאאס, כאטש די דעטאלן זענען נאך נישט באשטעטיגט געווארן.


די פאליציי האט געענטפערט מיט טרערן גאז, וואסער קאנאנען און ראבער קוילן. לויט די העלט מיניסטעריום, זענען 272 מענטשן פארוואונדעט געווארן אין טיראנא אין לויף פון פינף טעג, אריינגערעכנט 169 פאליציאנטן.


פארוואס פראטעסטירט מען?

די פראטעסטירער פאדערן אז פרעמיער מיניסטער ראמא זאל רעזיגנירן, צוליב קארופציע סקאנדאלן, הויכע קאסטן פאר אוניווערסיטעטן, די שווערע לעבנס-קאסטן און א מאנגל אין דזשאבס. די פראטעסטן האבן אויך אריינגעצויגן אסאך מענטשן וואס האבן זיך באטייליגט אין די זומער פראטעסטן קעגן א לוקסוריעזע רעזארט פראדזשעקט וואס איז פארבינדן צו דזשעראד קושנער.


דער פאליציי טשיף, סקענדער היטא, איז ציטירט געווארן זאגנדיג אז 1,067 מענטשן זענען ארעסטירט געווארן און 388 ווערן אנגעקלאגט. אבער אנדערע נייעס קוועלער האבן באריכטעט בלויז 167 ארעסטן אין די ערשטע פינף טעג, אזוי אז די פונקטליכע נומערן זענען דערווייל אומקלאר.


דער פרעמיער מיניסטער גיט זיך נישט אונטער

דער פרעמיער מיניסטער זאגט זיך אפ פון אראפטרעטן, אנרופנדיג די פראטעסטן די ארבעט פון אן "אויסערליכע האנט". ער האט געווארנט אז די געוואלדטאטן שטעלן אין געפאר אלבאניע'ס ציל זיך אנצושליסן אינעם 'אייראפעאישן פאראיין' (EU) ביז יאר 2030.


אין די זעלבע צייט איז די רעגירונג אונטער דרוק איבער די ברוטאלע פאליצייאישע רעאקציע. זיבן פאליציאנטן זענען סוספענדירט געווארן פארן נוצן איבעריגע קראפט, די אי-יו דעלעגאציע האט פארלאנגט א פראפארציאנעלע רעאקציע, און 141 אוניווערסיטעט פראפעסארן האבן פארדאמט די פאליציי ברוטאליטעט קעגן די סטודענטן.


מיט די פראטעסטירער וואס זאגן צו צו בלייבן אין די גאסן און א פרעמיער מיניסטער וואס רירט זיך נישט פון ארט, איז די גרויסע פראגע צי די אנגעצויגנקייט וועט זיך ענדיגן מיט פארהאנדלונגען, מער בלוט-פארגיסונג, אדער א פאליטישע ערדציטערניש.