היסטארישע מיסיע: יאפאן שיקט ארויף א קאסמאס-שיף צום 'מאדים' פלאנעט צו ברענגען סעמפלס פון איר לבנה


יאפאן האט סוקסעספול ארויסגעשאסן איר נייע קאסמאס-שיף, באקאנט אלס די MMX פראבע, אויף א לאנגע רייזע מיטן ציל צוריקצוברענגען שטיקלעך פון 'פאבאס' (Phobos), איינע פון די לבנות פונעם מאדים פלאנעט (Mars).


אן H3 ראקעט האט זיך געהויבן פונעם טאנעגאשימא קאסמאס-צענטער דעם 20'סטן אקטאבער 2026 (יאפאנעזע צייט), און די קאסמאס-שיף האט זיך אפגעטיילט פונעם הויפט ראקעט ארום 71 מינוט שפעטער, פונקט ווי געפלאנט.


לויטן פלאן וועט די פראבע אנקומען צום מאדים אין אוגוסט 2027 און אנהייבן צירקולירן ארום פאבאס אין סעפטעמבער 2027. די עכטע ארבעט פון צוזאמנעמען די סעמפלס וועט זיך אבער נישט אנהייבן בעפאר דעצעמבער 2028. די קאסמאס-שיף וועט אראפלאזן א ספעציעלע ראווער וואס וועט צוזאמנעמען כאטש 10 גראם פון מאטעריאל פון צוויי אנדערע לאקאציעס אויפן אויבערפלאך, און עס צוריקברענגען צום ערד-קוגל אין יאר 2031.


די קאמפליצירטע מיסיע ווערט דורכגעפירט מיט די הילף און עקספערטיז פון עטליכע אנדערע גרויסע קאסמאס אגענטורן, אריינגערעכנט די אמעריקאנער 'נאסא', די אייראפעאישע 'אי-עס-עי', ווי אויך פראנצויזישע און דייטשע אגענטורן.


אויב אלעס גייט ווי געפלאנט, וועט די MMX זיין די ערשטע מיסיע אין די היסטאריע צו ברענגען סעמפלס פונעם מאדים סיסטעם, און יאפאן וועט דערמיט אויסכאפן כינע, וועלכע פלאנט אן ענליכע מיסיע (טיאנווען-3) ארום יאר 2028.


סייענטיסטן האפן אז די סעמפלס וועלן ענטפערן א לאנג-יעריגע פראגע: צי די לבנות פונעם מאדים זענען ארגינעל געווען אסטערוידן וואס זענען פארכאפט געווארן דורך די גראוויטאציע פונעם פלאנעט, אדער זענען זיי באשאפן געווארן פון ברוכווארג נאך א מאסיווע צוזאמענשטויס. דאס קען אויך געבן א בעסערע פארשטאנד וויאזוי די גאנצע זון-סיסטעם איז באשאפן געווארן.


דער סוקסעספולער ארויסשאס איז אויך א גרויסע דערגרייכונג פאר די H3 ראקעט זעלבסט, וויבאלד דאס איז איר ערשטע אינטערפלאנעטארישע מיסיע, קומענדיג נאך א דורכפאל מיטן ראקעט פאראיאר דעצעמבער. הגם עס איז נאך דא א לאנגער און ריזיקאלישער וועג פאראויס, האט יאפאן דערווייל אריבערגעשפרינגען דעם ערשטן גרויסן שטרויכלונג אינעם געיעג צו ברענגען מאטעריאל פון אן אנדערן וועלט.