שוידערליכע בילדער פונעם פלאץ וואו א פריוואטע דזשעט האט געקראכט אין פלארידע, איבערלאזנדיג 9 טויטע


דראמאטישע בילדער פון דער לופטן צייגן דעם ריזיגן לאך און די צעווארפענע ברוכווארג וואס איז איבערגעבליבן נאך א טויטליכע 'ליערדזשעט 60' עראפלאן קראך אין פאלם ביטש קאונטי, פלארידע, דעם 1'טן נאוועמבער 2026. דער פליגער האט אריינגעקראכט אין די 'מיליטערי טרעיל' שאסיי מיט א געוואלדיגע שנעלקייט, אויפברעכנדיג טיילן פונעם ראוד און צעווארפנדיג שטיקער איבער די גאנצע גאס און ארומיגע גראז.


דער פריוואטער דזשעט איז געווען אויפ'ן וועג פון אסטין, טעקסאס קיין די באהאמאס, מיט 9 מענטשן דערויף, וועלכע זענען אלע אומגעקומען אין די טראגעדיע. בעפאר דעם קראך, האט די מאנשאפט באריכטעט אז זיי זענען אנגעקומען אין א זאנע פון לייכטע אייז און מעסיגע טורבולענץ (וואקלענישן) בעת'ן פליען אויף א הייך פון ארום 35,000 פיס. אינוועסטיגעיטארס פארשן יעצט אויס די לעצטע מינוטן פונעם פליגער, נאכדעם וואס די פילאטן האבן ארויסגעגעבן א 'מעידעי' עמערדזשענסי רוף נאך א שנעלע, אומקאנטראלירטע פאל פון איבער 20,000 פיס א מינוט. די שרעקליכע קראך האט אויך פארוואונדעט איין פערזאן אויף דער ערד, וואס האט צוגעגעבן צו די כאאס ביים קראך ארט.


די אויספארשונג האט אנטדעקט באווייזן וואס צייגן אז דער פליגער האט זיך מעגליך צעבראכן נאך אינמיטן פליען אין די לופטן בעפאר'ן קראכן אויף דער ערד. אינוועסטיגעיטארס האבן געפונען טיילן פונעם לינקן 'עלעוועיטאר' (א טייל פונעם עק) אזוי ווייט ווי 3.8 מייל אוועק פונעם הויפט קראך ארט, וואס צייגט אז שטיקער פונעם עראפלאן האבן זיך אפגעריסן אינמיטן פאלן.


די געוואלדיגע קראפט פונעם קראך האט געשאפן א טיפע לאך אינעם שאסיי, און די ברוכווארג איז געווארן צעווארפן אויף א גאר ברייטע שטח. די וועטער אומשטענדן, אריינגערעכנט די אייז און טורבולענץ, זענען צווישן די פאקטארן וואס די אינוועסטיגעיטארס וועלן נעמען אין באטראכט בעת זיי פרובירן צוזאמצושטעלן דעם בילד פון די לעצטע מינוטן. דערווייל איז אבער די פונקטליכע אורזאך פונעם קראך נאכנישט פעסטגעשטעלט געווארן. מען וועט דארפן אנאליזירן די געפונענע שטיקער, די פלייט דאטא, און אנדערע באווייזן בעפאר מען וועט קענען באשטימען וואס האט געפירט צו די טראגישע טויט פון אלע 9 מענטשן אויפ'ן פליגער.