בס"ד

טראנספארטאציע סעקרעטאר דאפי: אן אלטע קופערנע דראט האט געפירט צום היסטארישן 'גראונד סטאפ'; פאדערט 50 ביליאן דאלאר פאר א פולע איבערבוי


טראנספארטאציע סעקרעטאר שאן דאפי זאגט אז דער נאציאנאלער 'גראונד סטאפ' וואס איז פארגעקומען פרייטאג, האט זיך אנגעהויבן צוליב אן 'אפגרעיד' ביי א ווייטע לאקאציע פון די פאדעראלע אוויאציע אגענטור (FAA). לויט דאפי, האט די קאנטראקטאר פירמע 'L3Harris' - וועלכע ארבעט שוין לאנגע יארן מיט די FAA - געהאלטן אינמיטן טוישן אן אלטע קופערנע ווייער צו א נייע 'פייבער' קעיבל, ווען דער ראוטער וואס מ'האט געטוישט האט אנגעהויבן איבערצופילן אנדערע ראוטערס אינעם 'עיר טרעפיק קאנטראל' סיסטעם.


דאפי ערקלערט אז די איבערגעפילטע סיסטעם האט פאראורזאכט ערנסטע פראבלעמען מיט די קאמוניקאציע צווישן די קאנטראלערס און די פליגערס, ווי אויך מיט די ראדאר סיסטעמען וואס ווערן גענוצט צו פירן די עראפלאנען. אינוועסטיגעיטארס פרובירן נאך אלץ צו דערגיין צי דער פראבלעם איז געקומען צוליב א טעות פונעם קאנטראקטאר אדער אינסטאלירער, אדער צי עס איז פשוט געווען א דעפעקטירטע שטיקל עקוויפמענט. די פירמע 'L3Harris' זאגט אז זיי ארבעטן אינאיינעם מיט די FAA ארויסצוהעלפן מיט די אויספארשונג.


דער סעקרעטאר האט אויסגענוצט די געלעגנהייט צו לייגן דרוק אויף קאנגרעס, זאגנדיג אז דאס לאנד'ס עיר טרעפיק קאנטראל סיסטעם איז שרעקליך אלט און נויטיגט זיך אין א פולשטענדיגע איבערבוי, אנשטאט צו מאכן פלאסטער-פארריכטונגען יעדע שטיק צייט. ער האט געפאדערט 50 ביליאן דאלאר אין עמערדזשענסי פאנדינג, אינדערצייט וואס קריטיקירער, אריינגערעכנט דעמאקראטן, האבן שארף פארדאמט די אדמיניסטראציע'ס רעאקציע צום קריזיס.


דער פרייטאגדיגער גראונד סטאפ איז געווען די לענגסטע נאציאנאלע אפשטעל אויף פליגערס אין מער ווי צוויי יארצענדלינגען, און האט איבערגעלאזט טויזנטער קענסעלד פלייטס איבער'ן לאנד. די פראגע צי דער דורכפאל איז געקומען צוליב אלטע עקוויפמענט, א קאנטראקטאר טעות, אדער ביידע אינאיינעם, בלייבט דערווייל אומפארענטפערט, און דער ענטפער דערויף וועט ווארשיינליך שפילן א הויפט ראלע אינעם קומענדיגן דעבאטע אין קאנגרעס איבער די פאנדינג.