בס"ד

וויליאמסבורג: א 52-יעריגער איד ברוטאל אטאקירט שבת אינדערפרי אויפ'ן וועג אין שול; פארדעכטיגטער ארעסטירט

א 52-יעריגער היימישער איד איז געווארן דער קרבן פון א ברוטאלע אטאקע שבת אינדערפרי, אינמיטן העלן טאג, בשעת'ן שפאצירן אין שול אריין אין וויליאמסבורג. דער אינצידענט האט פאסירט ארום 8:40 אינדערפרי, ביים ווינקל פון בעדפארד עוועניו און העיווארד סטריט, א געגנט וואס איז פיל מיט היימישע אידן.

אויף די סורוועילענס קאמערעס קען מען זען ווי דער פארדעכטיגטער דערנענטערט זיך צום איד און באגיסט אים מיט אן אומבאקאנטע פליסיקייט, און באלד דערנאך הייבט זיך אן א פיזישע געשלעג. דער קרבן האט זיך אבער נישט געלאזט און האט צוריקגעקעמפט מיט קלעפ און בריקן, ביז ארומיגע אנוועזנדע און וואלאנטירן פון 'וויליאמסבורג שומרים' זענען אריינגעשפרינגען און אראפגעדרוקט דעם פארברעכער צו דער ערד.

פאליציי אפיצירן פונעם 90'סטן פריסינקט זענען אנגעקומען אויפ'ן סצענע און ארעסטירט דעם אטאקירער. די פאליציי פארשן יעצט אויס די אומפראוואצירטע אטאקע אלס א מעגליכע 'העיט קריים' (האס פארברעכן). דער אטאקירטער איד איז באהאנדלט געווארן אויפ'ן ארט דורך הצלה וואלאנטירן און איז אפגעפירט געווארן אין שפיטאל. ער געפינט זיך ברוך השם אין א סטאבילע צושטאנד, כאטש עס זענען דא פארשידענע באריכטן איבער ווי שווער זיינע וואונדן זענען.

דערווייל זענען נאך פארבליבן עטליכע אפענע פראגעס איבער דעם אינצידענט, אריינגערעכנט וואס פונקטליך די פליסיקייט איז געווען, פארוואס דער איד איז געצילט געווארן, און מיט וועלכע קלאגעס דער פארדעכטיגטער וועט ווערן אנגעקלאגט. ווי פארשטענדליך, ווערט דער פארדעכטיגטער געזעצליך פאררעכנט אלס אומשולדיג ביז די געריכט טרעפט אים שולדיג.