בס"ד

נתניהו ביי די אפיציעלע צערעמאניע אפצייכענענדיג 3 יאר זינט די שמחת תורה אטאקעס: "יעדער וואס איז געווען פארמישט לעבט אויף געבארגטע צייט"

פרעמיער מיניסטער בנימין נתניהו האט היינט איבערגעגעבן א שארפע און אנטשלאסענע מעסעדזש ביי די אפיציעלע סטעיט מעמאריאל צערעמאניע אויף 'הר הרצל', אפצייכענענדיג דריי יאר זינט די בלוטיגע שמחת תורה אטאקעס. "יעדער איינער וואס איז געווען פארמישט אין די אטאקע קעגן אונז און האט געהאלטן אונזערע משכונות לעבט אויף געבארגטע צייט," האט נתניהו געזאגט פארן ציבור, צולייגנדיג אז "טאג איין טאג אויס מאכן מיר א חשבון מיט די דאזיגע נידערטרעכטיגע מערדער."

נתניהו האט אויך אויסגענוצט די געלעגנהייט אראפצושטעלן א קלארע ליניע איבער די צוקונפט פון עזה, שווערנדיג קליפ און קלאר אז כאמאס וועט מער קיינמאל נישט געוועלטיגן אינעם ראיאן.

די צערעמאניע, וואס איז פארגעקומען אין די 'חלקת גדולי האומה' אויף הר הרצל אין ירושלים, האט זיך אנגעהויבן מיט א מינוט פון שטילקייט פונקטליך 6:29 אינדערפרי, די פונקטליכע מינוט וואס כאמאס האט אנגעהויבן זייער אטאקע אין יאר 2023. ביי די צערעמאניע האט מען אפגעגעבן כבוד פאר די מער ווי 1,200 אומגעקומענע אין די ארגינעלע אטאקע, אינאיינעם מיט די טויזנטער זעלנער און זיכערהייט קרעפטן וואס זענען געפאלן אין די קריג וואס האט נאכגעפאלגט.

פרעזידענט יצחק הערצאג האט זיך באצויגן צו די שווערע פארלוסטן אין זיין רעדע, וואו ער האט דערמאנט די טראגישע געשיכטע פון די זעלנער וואס זענען געשטאנען אויף דער וואך ביים 'נחל עוז' באזע, פון וועלכע עטליכע זענען אומגעקומען אדער פארכאפט געווארן אלס משכונות בעת זיי האבן איבערגעגעבן די ערשטע ווארענונגען איבער די אינפילטראציע. הערצאג האט געווארנט אז מ'טאר נישט איגנארירן קיין אינערליכע אדער אויסערליכע צייכנס פון א פראבלעם ווען מען גייט פאראויס.

נתניהו'ס ווערטער זענען אין איינקלאנג מיט וואס מדינת ישראל באאמטע האבן איבערגעחזר'ט דורכאויס דעם קאנפליקט, אראפשטעלנדיג די אנגייענדע מיליטערישע קאמפיין אלס אן אפענער חשבון מיט יעדן איינעם וואס איז געווען פארבונדן מיט די אטאקע. די צערעמאניע קומט אין א צייט וואס מדינת ישראל גייט צו קומענדיגע וואלן, און זיכערהייט באאמטע האבן באזונדער געווארנט אז כאמאס קען פרובירן אויסצונוצן דעם פאליטישן מאמענטום פאר זייערע אינטערעסן.