אומאן: צוגרייטונגען צום גרויסן 'קיבוץ' קומט צו אן ענדע, געשאצטע 50 טויזנט אידן ערווארטעט אויף יום טוב

אומאן. — די צוגרייטונגען צום יערליכן ראש השנה 'קיבוץ' אין אומאן דערנענטערט זיך צו די לעצטע פאזעס, ווען א געשאצטע 50,000 אידן זענען ערווארטעט צו פראווען דעם יום טוב אין די אוקראינישע שטאט, בעת די לעצט-פארבליבענע רייזנדע מאכן איצט זייער וועג צום ציון פון הרה"ק ר' נחמן מברעסלב זי"ע.

פרישע בילדער און ווידעאוס פונעם ציון הקדוש צייגן ווי די גאנצע ארום איז געפאקט מיט טויזנטער מתפללים אין די לעצטע שעה'ן בעפאר ראש השנה, און דער ריזיגער ציבור וואקסט פון מינוט צו מינוט.

דא אויף 'א בליק' האבן מיר נאכגעפאלגט די גרויסע צוגרייטונגען דורכאויס די וואך, ווען טויזנטער אידן פון אלע עקן וועלט זענען אנגעקומען קיין אומאן. פריערדיגע בילדער האבן שוין געוויזן די וואקסנדע מאסן וואס זיצן און לערנען און דאווענען ביים ציון, און די סצענעס זענען געווארן מער און מער געפאקט ווי נענטער עס איז געקומען צום יום טוב.

אין א פרישע שטודיע וואס איז ארויסגעגעבן געווארן די וואך דורך די 'איזראעל דעמאקראסי אינסטיטוט', ווערט אנגעוויזן אז א געשאצטע 50,000 מענטשן קומען יערליך צום ציון פון ר' נחמן אויף ראש השנה, וואס דאס שטרייכט אונטער דעם מאסיוון פארנעם פונעם יערליכן קיבוץ.

יעצט, ווען ראש השנה פאלט אריין פרייטאג צונאכטס, קומען די אלגעמיינע הכנות איבער גאנץ אומאן צו אן ענדע, און די צענדליגער טויזנטער מתפללים גרייטן זיך מיט גרויס התעוררות אריינצוגיין אינעם הייליגן יום טוב.