פרישע דעטאלן אנטפלעקט איבער דעם היסטארישן באזוך פון די אדמורי"ם אין ווייסן הויז: א דראפט-בריוו איבער די גזירת הגיוס וואס איז צום סוף נישט איבערגעגעבן געווארן

פרישע דעטאלן זענען ארויסגעקומען ארום דעם היסטארישן מיטינג וואס איז פארגעקומען דעם פארגאנגענעם דאנערשטאג אין ווייסן הויז, צווישן פרעזידענט דאנאלד טראמפ און א דעלעגאציע פון גדולי האדמורי"ם און רבנים. צווישן אנדערע איז אנטפלעקט געווארן א פלאנירטע בריוו וואס האט געזאלט בעטן דעם פרעזידענט'ס אריינמישונג איבער די שווערע מצב פון די חרדי'שע קהילה אין ארץ ישראל.

דער בריוו, וואס איז געווען אדרעסירט דירעקט צום פרעזידענט אונטערן קעפל "א דרינגענדע רוף צו באשיצן די רעכטן פון די חרדי'שע קהילה אין מדינת ישראל", איז צוגעגרייט געווארן אין ליכט פון די אנגייענדע גזירת הגיוס און די עקאנאמישע און ציווילע סאנקציעס וואס קומען מיט דעם.

לויט א באריכט אין 'ישראל היום', האט דער פארגעשלאגענער בריוו גערופן טראמפ צו אויפברענגען די זארגן מיט די מדינת ישראל פירער, און פאדערן אז מען זאל באשיצן די רעכטן פון די חרדי'שע בירגער.

צווישן די פארלאנגען אינעם דאקומענט איז געווען א בקשה צו באשיצן רעליגיעזע פרייהייט, פרייהייט פון געוויסן און פרייהייט פון באוועגונג, ווי אויך א גלייכע רעכט צו סאשעל בענעפיטן, פובליק סערוויסעס, ארבעט און פאנדינג פאר מוסדות.

דער בריוו האט אויך געפאדערט אז מען זאל נעמען שריט צו פארזיכערן אז פרויען און קינדער זאלן נישט ליידן קיין קאנסעקווענצן צוליב דעם סטאטוס פון א מאן אדער טאטע ביים מיליטער, און געבעטן אז די גאנצע אישו זאל נישט פירן צו קאלעקטיווע שטראפן קעגן די ברייטערע חרדי'שע קהילה.

דער מערסט אומגעווענליכער פארשלאג אינעם בריוו איז מעגליך געווען א פארלאנג אז פרעזידענט טראמפ זאל שטעלן א הויכראנגיקן ווייסן הויז פארשטייער אנצוהאלטן א דירעקטע קאנטאקט מיט פארשטייער פון די ארטאדאקסישע קהילה, איבערצוקוקן די רעלעוואנטע דאקומענטאציע און האלטן א נאנטע אויג אויף די אנטוויקלונגען.

טראץ די אלע צוגרייטונגען, איז דער בריוו צום סוף נישט געשיקט אדער איבערגעגעבן געווארן פאר פרעזידענט טראמפ, לויט 'ישראל היום'. דער נייעס קוואל גיט איבער אז דער דאקומענט איז געברענגט געווארן פאר עטלעכע גדולי ישראל צו באטראכטן, אבער למעשה האט מען אפגעשטעלט דעם פלאן.

די נייע דעטאלן קומען ארויס אין א צייט וואס עס קומען כסדר אריין פרישע באריכטן איבער דעם פארמאכטן מיטינג דאנערשטאג. לויט דעם זעלבן באריכט, האט די גאנצע דעלעגאציע זיך קודם געטראפן מיט טראמפ, און דערנאך האט כ"ק אדמו"ר מסאטמאר שליט"א (מהרא"א) געהאט א באזונדערע פריוואטע שמועס מיטן פרעזידענט וואס האט געדויערט ארום 10 מינוט.

עס בלייבט דערווייל אומבאקאנט וועלכע ספעציפישע נושאים זענען למעשה אויפגעברענגט געווארן מיט טראמפ. קיין אפיציעלע סך הכל פון די פארמאכטע געשפרעכן איז נישט ארויסגעגעבן געווארן, וואס דאס מיינט אז דער פאקט אז אזא בריוו איז געשריבן געווארן באשטעטיגט נאכנישט אז די גזירת הגיוס אישו זעלבסט איז בכלל אויסגעשמועסט געווארן מיטן פרעזידענט.