מאסן חרדי'שע אידן זענען דאנערשטאג ארויסגעקומען אויף שטורמישע הפגנות אין ירושלים און אין בני ברק, וואו זיי האבן בלאקירט הויפט שאסייען אלס טייל פון די אנגייענדע פראטעסטן קעגן די ביטערע גזירת הגיוס.

אין ירושלים האבן זיך די פראטעסטירער פארזאמלט נעבן דעם 'גשר המיתרים' ביים אריינגאנג צו די שטאט, וואס האט געפירט צו שווערע טראפיק און כאאס אין די גאנצע ארומיגע געגנט. אין דער זעלבער צייט איז פארגעקומען א מאסיווע הפגנה אויף הייוועי 4 (כביש 4) נעבן בני ברק, וואו די מוחים האבן אינגאנצן אפגעשטעלט דעם פארקער אויפ'ן שאסיי.

דורכאויס די הפגנה אין ירושלים האט זיך אפגעשפילט א שרעקעדיגער אינצידענט ווען א קאר איז אריינגעפארן אין די פראטעסטירער. בחסדי השם איז לויט די ערשטע באריכטן קיינער נישט פארוואונדעט געווארן.

עס ווערט ערווארטעט אז פרישע הפגנות וועלן פארקומען שפעטער אין טאג אין פארשידענע צענטערן איבער'ן לאנד.