פרעזידענט טראמפ וועט זיך טרעפן מיט קאטאר'ס פרעמיער מיניסטער איבער א פרישן איראנער פארשלאג צו עפענען דעם הארמוז דורכגאס

פרעזידענט דאנאלד טראמפ איז ערווארטעט זיך צו טרעפן מיט קאטאר'ס פרעמיער מיניסטער, שעיך מוחאמעד בין אבדולראמאן אל טהאני, אין ווייסן הויז דעם נאוועמבער 9, צו דורכרעדן א באריכטעטן איראנער פארשלאג וואס צילט צוריק צו עפענען דעם סטראטעגישן הארמוז דורכגאס.

לויט א באריכט אין 'ישראל היום', וועלכע ציטירט דיפלאמאטישע קוועלער וואס זענען באקאנט מיט די פארהאנדלונגען, לייגט טעהראן פאר אפצושטעלן די אטאקעס אויף קאמערציאלע שיפן פון די גאלף לענדער, אין אויסטויש פאר די באפרייאונג פון ארום 8 ביליאן דאלאר אין פארפרוירענע איראנער פאנדן וואס ווערן געהאלטן אין קאטאר. דער באריכטעטער אפמאך וועט אויך פאדערן פון וואשינגטאן אויפצוהייבן איר פלאטע און עקאנאמישע בלאקאדע קעגן איראן.

דער פארשלאג צייגט א באדייטנדע טויש אין טעהראן'ס פאזיציע, וויבאלד איראן פאדערט שוין נישט קיין קאנטראל איבער דעם סטראטעגישן וואסער-וועג, אדער די רעכט צו מאנען טראנזיט אפצאלן פון שיפן וואס פארן דורכ'ן דורכגאס. אבער, דער פארשלאג אדרעסירט בכלל נישט איראן'ס נוקלעארע פראגראם, וואס איז איינע פון וואשינגטאן'ס הויפט זארגן אינעם קאנפליקט.

קאטאר שפילט א צענטראלע ראלע אין פירן די אומדירעקטע פארהאנדלונגען צווישן וואשינגטאן און טעהראן, און דער באזוך פונעם פרעמיער מיניסטער איז נאך א פרואוו צו פארשמעלערן די דיפערענצן צווישן די צוויי זייטן. וויצע פרעזידענט דזשעי. די. ווענס איז אויך אריינגעמישט אינעם דיפלאמאטישן פראצעס און עס איז ערווארטעט אז ער וועט זיך עקסטער טרעפן מיטן קאטאר'ן פירער.

דאך שטייט דער פארשלאג אויס ערנסטע שוועריגקייטן, נאך וואס הויכראנגיגע אמעריקאנער באאמטע האבן אויסגעדרוקט קעגנערשאפט צו אן אפמאך וואס וועט געבן פאר איראן א מאסיווע פינאנציעלע הילף אן לייזן דעם נוקלעארן קריזיס. סעקרעטערי אוו סטעיט מארקא רוביא האט אויך געווארנט אז די פארהאנדלונגען האבן דערווייל געמאכט גאר שוואכע פארשריט, אנרופנדיג טייל פון טעהראן'ס פאדערונגען אלס "אומריאליסטיש".

דערווייל איז נאך קיין שום אפמאך נישט געמאלדן געווארן, און די באריכטעטע 8 ביליאן דאלאר אפמאך איז נאך נישט עפנטליך באשטעטיגט געווארן דורך די אמעריקאנער, איראנער, אדער קאטאר'ע רעגירונגען. דער רעזולטאט פון טראמפ'ס געשפרעכן מיט קאטאר קען דעריבער זיין גאר קריטיש צו באשליסן צי די דיפלאמאטישע פארהאנדלונגען וועלן קענען צוריקשטעלן די קאמערציאלע שיפסקער דורכ'ן הארמוז דורכגאס, בשעת'ן אדרעסירן וואשינגטאן'ס ברייטערע זיכערהייט זארגן.