אידישע קהילה פירער אין פראנקרייך דרוקן אויס טיפע זארג איבער די אנגייענדיגע אומרוען איבער'ן לאנד, וואס ברענגט א שרעק צווישן די ארטיגע אידן. אין דער זעלבער צייט גרייט זיך אן ארגאניזאציע וואס העלפט פראנצויזישע אימיגראנטן אין ארץ ישראל, אויף א מעגליכע כוואליע פון פרישע משפחות וואס וועלן זוכן צו אנטלויפן.

די וואקסנדע כאאס און אומרוען איבער פראנקרייך האט שטארק געהויבן די אנגסט ביי די לאקאלע אידישע קהילות. קהילה פירער ווארענען אז די שוואכע זיכערהייט צושטאנד קען פירן דערצו אז פילע משפחות זאלן באשליסן צו פארלאזן דאס לאנד.

אריאל קאנדעל, דער הויפט פון די 'קוואליטא' (Qualita) ארגאניזאציע וואס גיט זיך אפ מיט'ן ארויסהעלפן פראנצויזישע אידן וואס ציען זיך קיין ארץ ישראל, זאגט אז מען מאכט שוין ערנסטע צוגרייטונגען פאר א מעגליכע מאסיווע פלייץ פון אימיגראנטן, וויבאלד די זארג איבער די צוקונפט פון אידישקייט אין פראנקרייך ווערט אלס גרעסער.

אין אן אינטערוויו די וואך האט קאנדעל אנגעוויזן אז זיין ארגאניזאציע איז שוין אריבער פון בלויז רעדן צו פראקטישע שריט, זיך צוצוגרייטן פאר די לאגיסטישע טשאלענדזשעס וואס קומט מיט אזא גרויסע צאל פרישע אנקומענדע.

זיינע ווערטער קומען אין ליכט פון די געוואלדטאטן אין פראנקרייך, אריינגערעכנט אינצידענטן וואו א שול אין פאריז און אידישע געשעפטן אין מארסעי האבן געליטן שאדנס. כאטש עס איז נאכנישט קלאר באשטעטיגט געווארן אז די אטאקעס אויף די אידישע פארמעגנס זענען געווען דירעקטע אנטיסעמיטישע אקטן, האט עס אבער פארשטארקט די פחד ביי די אידישע איינוואוינער.

די אלגעמיינע אטמאספער פון אומזיכערהייט האט אויפגעברענגט פרישע פראגעס איבער די צוקונפט פון די אידישע קהילות אין פראנקרייך - וואס פארמאגט איינע פון די גרעסטע אידישע פאפולאציעס אינדרויסן פון ארץ ישראל. קאנדעל האט אנגעוויזן אויף א פרישע אנקעטע דורך די פראנצויזישע 'איפאפ' (Ifop) אינסטיטוט, וואס צייגט אז א רעקארד פון 52 פראצענט פראנצויזישע אידן האבן שוין געקלערט פון פארלאזן דאס לאנד.

כאטש די ציפערן מיינען נישט אז יעדער האט שוין למעשה באשלאסן זיך צו ציען, אדער אז זיי פלאנען דוקא צו פארן קיין ארץ ישראל, צייגט עס אבער אויף אן ערנסטע פראבלעם. לויט די באריכטן, גרייט זיך 'קוואליטא' אויף א סצענאר וואו די יערליכע אימיגראציע פון פראנקרייך קען דראסטיש שטיגן, און מעגליך דערגרייכן צווישן 10,000 און 15,000 מענטשן א יאר, אויב די מצב וועט זיך ווייטער פארערגערן.

פאר אידישע משפחות אין פראנקרייך איז דער באשלוס זיך צו ציען א גאר שווערע, וואס נעמט אריין קאמפליצירטע פראגעס איבער פערזענליכע זיכערהייט, פרנסה, חינוך הבנים, האוזינג, און דאס איבערלאזן זייערע לאנג-יעריגע קהילות. א גרויסע פלייץ פון אימיגראנטן וועט אויך ברענגען ערנסטע טשאלענדזשעס פאר די ארגאניזאציעס וואס דארפן העלפן די ניי-אנגעקומענע טרעפן דירות, דזשאבס, מוסדות פאר די קינדער און אנדערע וויכטיגע געברויכן.

דערווייל בלייבט נאך אומקלאר ווי גרויס די פאקטישע צאל וועט זיין, אבער די קלארע מעסידזש פון די קהילה פירער און ארגאניזאציעס איז, אז מען גרייט זיך אויף אן ערנסטע טויש אין די פראנצויזישע אידישע דעמאגראפיע.