פאריז: קאר פון לאקאלן חב"ד שליח פארברענט געווארן דורכאויס שווערע ראיאטן איבער שבת

הרב משה כהן האט געפינען זיין קאר שווער געשעדיגט מוצאי שבת נאך ווילדע ראיאטן אין צענטראל פאריז. טראץ זיין פערזענליכע שאדן, זענען די לאקאלע חב"ד שלוחים ארויסגעקומען צו הילף פאר אידישע איינוואוינער און ביזנעס אייגנטומער וואס זענען באטראפן געווארן פון די אומרוען.

א חב"ד שליח וואס דינט די אידישע קהילה אין צענטראל פאריז, איז אהיימגעקומען פון שול מוצאי שבת און אנטדעקט אז זיין קאר איז געווארן שווער געשעדיגט דורכאויס ווילדע ראיאטן וואס האבן ארומגענומען די 'פלאס דע לא רעפובליק' געגנט אין שטאט.

הרב משה כהן, וועלכער פירט די לאקאלע חב"ד הויז אינאיינעם מיט זיין רעביצין צפורה, האט געפינען זיין קאר מיט צעשמעטערטע פענסטערס און א פארברענטע אינעווייניג, נאך הבדלה דעם פארגאנגענעם מוצאי שבת, אקטאבער 17.

לויט א באריכט, איז די וואנדאליזם פארגעקומען בעיצומו של יום השבת, ווען ראיאטירער האבן אונטערגעצינדן פייערס און געשעדיגט קארס און לאקאלע ביזנעסער איבער די גאנצע ארומיגע געגנט. הרב כהן זאגט אז אויף די זיכערהייט קאמערעס קען מען קלאר זען ווי זיין קאר ווערט אונטערגעצינדן דורכאויס די אומרוען. אנדערע קארס וואס זענען געווען געפארקט אויפן גאס זענען אויך געשעדיגט געווארן. דער אינצידענט איז געווען א טייל פון ברייטערע אומרוען וואס האבן איבערגעלאזט טיילן פון צענטראל פאריז באטראפן פון פייערס, וואנדאליזם און רויבערייען.

טראץ די שווערע שאדן צו זיין אייגנטום, האט הרב כהן אונטערגעשטראכן אז מען דארף נישט אטאמאטיש אנקוקן דעם אינצידענט אלס אן אנטיסעמיטישע אטאקע. ער האט אנגעוויזן אז אידישע און נישט-אידישע איינוואוינער צוגלייך האבן געליטן שאדנס דורכאויס די געוואלדטאטן, און עס איז נישט דא קיין באווייזן אז זיין קאר איז ספעציפיש געצילט געווארן צוליב זיין אידישקייט.

די אומרוען האבן אויך אנגעמאכט שוועריגקייטן פאר די לאקאלע שומרי שבת. שומרים וואלאנטירן האבן געווארנט די מתפללים אין שול דורכאויס שבת אז די מצב נעבן די רעפובליק געגנט ווערט געפארפול, און זיי האבן געראטן יעדן זיך אומצוקערן אהיים ווי אמשנעלסטן.

הרב מאיר שלמה לובעצקי, א צווייטער חב"ד שליח אין די פאריז 3 דיסטריקט, האט געשילדערט די גרויסע שאדנס צו די גאסן און געשעפטן אין די באטראפענע געגנטער. גלייך נאך די ראיאטן, זענען די צוויי רבנים ארומגעגאנגען באזוכן אידישע ביזנעס אייגנטומער וועמענס געשעפטן זענען געשעדיגט געווארן, צו פאָרשלאגן שטיצע און העלפן די איינוואוינער מיט זייערע וויכטיגסטע געברויכן.

הרב כהן האט אויך אנגעהויבן ארגאניזירן הילף פאר מענטשן וואס האבן געליטן שאדנס וואס ווערן מעגליך נישט געדעקט דורך אינשורענס.

די שנעלע רעאקציע ברענגט ארויס די געטריישאפט פון די לאקאלע חב"ד שלוחים, וועלכע זענען ווייטער אנגעגאנגען מיט זייערע קהילה פליכטן אפילו ווען זייער אייגענע געגנט האט זיך געספראוועט מיט די נאכווייען פון די געוואלדטאטן. הרב כהן און זיין רעביצין דינען די אידישע קהילה אין די רעפובליק געגנט שוין זינט יאר 2010, צושטעלנדיג שיעורי תורה, אידישע פראגראמען און הילף פאר לאקאלע משפחות.

בעת די איינוואוינער אין פאריז הייבן אן זיך צו ערהוילן פון די אומרוען, גייען די לאקאלע שלוחים אן מיט זייער הייליגע ארבעט צו העלפן משפחות און ביזנעס אייגנטומער וואס נויטיגן זיך אין הילף.