די ארטיגע פאליציי אין ירושלים פארשן אויס א גאר שוידערליכן אינצידענט וואס האט זיך אפגעשפילט ביים שערי צדק שפיטאל, נאכדעם וואס א מאן האט לויט באריכטן איבערגעלאזט א טויטן פיטוס (עובר) נעבן דעם הויפט אריינגאנג פונעם שפיטאל. צוויי פארדעכטיגטע זענען שוין ארעסטירט געווארן דורך די פאליציי פאר אויספארשונגען.

דער פאל האט פאסירט מיטוואך (אקטאבער 21), ווען א מאן איז אנגעקומען צום שפיטאל, איבערגעלאזט דעם טויטן פיטוס ביים אריינגאנג, און גלייך פארלאזט דעם ארט. די שפיטאל פערסאנאל האבן באמערקט וואס עס האט פאסירט און האבן תיכף אלארמירט די פאליציי, וועלכע האבן אונטערגענומען אן אגרעסיווע זוכונג אפצוגעפינען דעם פארשוין.

די אויספארשונגען האבן געפירט די פאליציי צו א שול אין די קרית יובל געגנט אין ירושלים, וואו דער הויפט פארדעכטיגטער איז געפונען און ארעסטירט געווארן. ער איז אפגעפירט געווארן צו די 'מוריה' פאליציי סטאנציע פאר פארהערן. לויט שפעטערדיגע באריכטן אין די לאקאלע פרעסע, האבן די פאליציי אויך ארעסטירט זיין פרוי, ברענגענדיג די צאל ארעסטירטע אינעם קעיס צו צוויי.

ביידע סוספעקטס ווערן יעצט אויסגעפארשט דורך די דעטעקטיוון וועלכע פרובירן צו דערגיין די פונקטליכע אומשטענדן ארום דעם פאסירונג. דערווייל האבן די אויטאריטעטן נאכנישט פעסטגעשטעלט די אורזאך פונעם טויט פונעם פיטוס, אדער וואס עס האט געפירט צו דעם אז מען זאל עס ברענגען צום שפיטאל. די פאליציי גיט איבער אז די פונקטליכע פארמישונג פון די צוויי ארעסטירטע איז נאך אומקלאר, און זייער ארעסט באשטעטיגט נאכנישט קיין קרימינאלע שולד.

דער אינצידענט האט ארויסגערופן א שטארקע אויפטרייסעלונג, ספעציעל וויבאלד עס האט פאסירט ביים שערי צדק מעדיקעל סענטער, וואס איז פון די גרעסטע און מערסט באקאנטע שפיטעלער אין ירושלים און באדינט טויזנטער איינוואוינער פון די שטאט און די ארומיגע געגנטער. די פאליציי זאגט אז די אויספארשונג גייט אן אין פולן שוואונג, און עס איז דערווייל נישט קלאר צי עס וועלן ארויפגעשטעלט ווערן קרימינאלע קלאגעס קעגן דעם פארפאלק.