אמעריקאנער סעקרעטערי אוו סטעיט מארקא רוביא ווארנט איראן מיט א "שרעקליכן פרייז" אויב זיי וועלן עסקאלירן דעם קאנפליקט


דער אמעריקאנער סעקרעטערי אוו סטעיט, מארקא רוביא, האט ארויסגעשטעלט א שארפע ווארענונג אז איראן וועט באצאלן א "שרעקליכן פרייז" אויב זי וועט באשליסן צו עסקאלירן דעם קאנפליקט און אנהייבן מיליטערישע אקציעס קעגן די פאראייניגטע שטאטן אדער אירע אליאירטע אין די ראיאן.


רעדנדיג צו רעפארטערס אין פאריז דעם 10'טן נאוועמבער, נאך א מיטינג פון די G7 אויסערן מיניסטארן, האט רוביא געזאגט אז די אמעריקאנער קרעפטן זענען פולשטענדיג גרייט צו רעאגירן אויב טעהראן וועט אריבערגיין געוויסע רויטע ליניעס. זיין ווארענונג קומט אין די צייט וואס די טראמפ אדמיניסטראציע האלט אן א שווערע עקאנאמישע דרוק דורך שטרענגע סאנקציעס און א נעיווי בלאקאדע וואס צילט אפצוהאקן איראן'ס מעגליכקייט צו עקספארטירן אויל און מאכן געלט.


רוביא האט אנגעוויזן אז די שריט ברענגען אזעלכע שווערע עקאנאמישע שאדנס, אז פרעזידענט דאנאלד טראמפ פילט נישט קיין געברויך אין די יעצטיגע מינוט צו פארארדענען פרישע גרויסע מיליטערישע אפעראציעס. "אויב איראן באשליסט צו עסקאלירן און זיי באשליסן אנצוהייבן א מיליטערישע אקציע, דארף איך אייך נישט זאגן וואס עס וועט פאסירן אלס רעזולטאט דערפון," האט רוביא געזאגט. ער האט אראפגעלייגט די עקאנאמישע קאמפיין אלס א גאר סוקסעספולע, אבער האט קלארגעמאכט אז וואשינגטאן האט נישט אויסגעשלאסן קיין מיליטערישע אקציעס אויב די אומשטענדן וועלן זיך טוישן.


דער סעקרעטערי אוו סטעיט האט אויך אפגעווארפן די טענה אז די יעצטיגע מצב איז א "סטעילמעיט" (א פארהאקטע סיטואציע), זאגנדיג אז די עקאנאמישע דרוק אויף טעהראן ווערט נאר שטערקער און שווערער פון טאג צו טאג. ער האט געזאגט אז די סאנקציעס און די בלאקאדע האקן אפ איראן פון די אינטערנאציאנאלע אויל מארקעטס, און די אדמיניסטראציע ערווארט אז די פינאנציעלע קלאפ וועט נאר ווערן גרעסער וויבאלד די איבערגעבליבענע אויל שיפמענטס גייען אויס און די נעצן וואס העלפן זיי אויסמיידן די סאנקציעס ווערן צושטערט.


אין דער זעלבער צייט האט רוביא צוגעגעבן אז דיפלאמאטישע פארהאנדלונגען זענען נאך אלס מעגליך, כאטש ער האט אראפגעריסן איראן'ס יעצטיגע פאדערונגען אלס "אבסורד" און געזאגט אז וואשינגטאן איז נישט גרייט צו אקצעפטירן אן אפמאך אויף די טערמינען. זיינע ווערטער קומען נאכדעם וואס פרעזידענט טראמפ האט באשלאסן זיך צוריקצוהאלטן פון פרישע אטאקעס דערווייל, און ענדערש אנצוהאלטן דעם דרוק אויף איראן און באשיצן די אינטערנאציאנאלע שיפס-רוטעס.


די ווארענונג קומט אויך אינמיטן אנגעצויגענע שפאנונגען ארום דעם 'סטרעיט אוו הארמוז', וואו סטראשונגען קעגן קאמערציאלע שיפן האבן אויפגעברענגט זארגן איבער א ברייטערע עסקאלאציע אין די ראיאן. רוביא'ס מעסידזש איז געווען קלאר אז אמעריקע פלאנירט אנצוהאלטן די עקאנאמישע דרוק און מיליטערישע גרייטקייט אויף איין מאל, איבערלאזנדיג טעהראן מיט די מעגליכקייט פון שווערע קאנסעקווענצן אויב זיי הייבן אן נאך א מיליטערישע קאנפראנטאציע.