איראן אנטפלעקט א נייע אונטערערדישע "מיסיל שטאט" טיף אונטער דער ערד


די איראנער 'איסלאמישע רעוואלוציאנערע גווארדיע' (IRGC) האט אנטפלעקט וואס זיי רופן א נייע אונטערערדישע "מיסיל שטאט", און האבן פארעפנטליכט א ווידעא וואס צייגט ריזיגע טונעלן אנגעפילט מיט באליסטישע און קרוז מיסילס, לאנטשערס און מיליטערישע טראקס.


די ווידעא, וואס איז ארויסגעשטעלט געווארן דעם 10'טן נאוועמבער, צייגט ווי הויכראנגיקע איראנער מיליטערישע קאמאנדירן באזוכן דעם באזע און באטראכטן די וואפן. צווישן די באטייליגטע זענען געווען דער טשיף אוו סטעף פון די איראנער געווער קרעפטן, מעידזשאר גענעראל אלי אבדולאחי, און דער קאמאנדיר פון די עראוספעיס קרעפטן, בריגאדיר גענעראל מאדזשיד מוסאווי.


איראנער סטעיט מידיא האט פרעזענטירט דעם קאמפלעקס אלס א טייל פון טעהראן'ס באמיאונגען צו באשיצן אירע מיסיל פראגראמען פון מעגליכע אטאקעס דורך אמעריקע און מדינת ישראל. דער ווארטזאגער פון די רעוואלוציאנערע גווארדיע, בריגאדיר גענעראל כוסעין מאהעבי, האט אויך געמאלדן אז די פראדוקציע ליניעס פאר מיסילס און דראונס זענען אריבערגעפירט געווארן פון אויבערפלאך פאסילעטיס צו אונטערערדישע קאמפלעקסן, כדי צו קענען אנגיין מיט די פראדוקציע אפילו אונטער שווערע באמבארדירונגען.


די מעלדונג לייגט א קלארן דגוש אויף איראן'ס ציל צו בויען אונטערערדישע מיליטערישע אינפראסטרוקטור, כדי צו ווייזן אז אירע וואפן פראגראמען קענען איבערלעבן כסדר'דיגע לופט אטאקעס. לויט איראנער באאמטע, זענען די פאסילעטיס נישט בלויז געמאכט צו האלטן וואפן, נאר אויך צו פראדוצירן פרישע וואפן טיף אונטער דער ערד, וואס קען מעגליך ערלויבן דאס לאנד צו אנהאלטן איר סופליי פון מיסילס אינמיטן א קריג.


דאך האט טעהראן נישט ארויסגעגעבן קיין דעטאלן איבער די פונקטליכע לאקאציע פונעם נייעם סייט, וויפיל מיסילס עס ווערן דארט געהאלטן, אדער ווי ווייט די פראדוקציע קען דארט אנגיין. די ווידעא אליינס צייגט אויך נישט קלאר וויפיל פון די געוויזענע וואפן זענען טאקע אפעראציאנאל און גרייט צו נוצן, אדער צי די באזע איז א ניי-געבויטע.


דאס קומט נאך עטליכע אמעריקאנער און מדינת ישראל סטרייקס וואס האבן געצילט איראנער מיליטערישע אינפראסטרוקטור, און אינמיטן אנגעצויגענע שפאנונגען איבער טעהראן'ס מיסיל פראגראם. מיט'ן ארויסשטעלן די ווידעא, פרובירט איראן צו שיקן א מעסידזש פון מיליטערישע שטארקייט, אבער לאזט איבער אסאך וויכטיגע פראגעס אומגעענטפערט איבער די עכטע גרייטקייט פון איר ארסענאל.